الماتىداعى ستۋدەنتتەر سەسسيانى ەرتە تاپسىرىپ، ۇيلەرىنە ەرتەرەك قايتىپ جاتىر. عىلىم جانە جوعارى ءبىلىم مينيسترلىگى عىلىم كوميتەتىنىڭ ءتوراعاسى دارحان احمەد-زاكي مۇنىڭ سەبەبىن ءتۇسىندىردى.
كوميتەت ءتوراعاسى جۋرناليستەردىڭ "بۇل جاعداي 16 جەلتوقساندا قاڭتار وقيعاسى قايتالانباس ءۇشىن جاسالىپ جاتىر ما" دەگەن سۇراعىنا ناقتى جاۋاپ بەرمەدى.
دارحان احمەد-زاكي ستۋدەنتتەردىڭ ەرتەرەك سەسسيا تاپسىرۋىن وقۋ باعدارلاماسىمەن جانە جوسپارىمەن بايلانىستىردى.
"بۇل وقۋ ءۇردىسىن ۇيىمداستىراتىن كوميتەتتەردىڭ قۇزىرىندا. ءاربىر جوعارى وقۋ ورنىنىڭ ءوز جوسپارى، باعدارلاماسى بار. جاۋاپتى ماماندار جاقىندا مالىمەت بەرەدى. مۇنداي تاجىريبە كوۆيد كەزىندە دە بولدى. سۇراقتارىڭىز بولسا، جازىڭىزدار. ءبىزدىڭ كوميتەت جاۋاپ بەرەدى" دەدى دارحان احمەد-زاكي.
الماتىدا 16 جەلتوقسان قارساڭىندا ءتۇرلى بەلسەندىلەر حالىقتى ميتينگكە شىعۋعا ۇندەپ، ۋنيۆەرسيتەت باسشىلىعى ستۋدەنتتەردى ۇيلەرىنە قايتارۋ قالادا بولاتىندارعا ەشقايدا شىقپاۋ تۋرالى قولحات جازدىرىپ الۋ داستۇرگە اينالىپ كەتتى. كوپشىلىك مۇنى بيلىك جەلتوقسان، جاڭاوزەن وقيعالارى بولعان 16-17 جەلتوقسان كۇندەرى ساياسي كۇشتەردىڭ بەلسەندىلىگى نارازىلىق اكسيالارىنا اينالىپ كەتپەسىن دەپ ساقتانۋ ءۇشىن جاسايدى دەگەن پىكىردە.
پىكىر قالدىرۋ