2023 جىلدىڭ 1 قاڭتارىنان باستاپ قازاقستاندا ەڭ تومەنگى جالاقى 60 مىڭ تەڭگەدەن 70 مىڭ تەڭگەگە وسەدى. بۇل تۋرالى ۇلتتىق ەكونوميكا ءبىرىنشى ۆيسە-مينيسترى تيمۋر جاقسىلىقوۆ ايتتى. 

رەسمي دەرەك بويىنشا، ەلىمىزدە 1،8 ميلليونعا جۋىق ادام ەڭ تومەنگى جالاقىعا كۇن كورىپ وتىر. ءقازىر ەڭ تومەنگى جالاقى – 60 مىڭ. 

"بيىل ينفلياسيانىڭ جوعارى دەڭگەيى حالىقتىڭ تابىسىنا تەرىس اسەرىن تيگىزىپ وتىر. بۇعان قوسا، 2023 جىلعى 1 قاڭتاردان باستاپ ەڭ تومەنگى جالاقى مولشەرى 70 مىڭ تەڭگەگە دەيىن وسىرىلەتىن بولادى"، – دەدى ۆيسە-مينيستر.

بۇعان دەيىن ەكى جىل بويى ەلدەگى ەڭ تومەنگى جالاقى مولشەرى 42 500 تەڭگە بولعان.

قارجىگەر جالعاسبەك اقبولات ەڭ تومەنگى جالاقى مولشەرىنىڭ ءوسۋى ەل ەكونوميكاسىنا، حالىقتىڭ ءال-اۋقاتىنا ايتارلىقتاي اسەر ەتپەيتىنىن ايتادى. تەك عىلىم سالاسىندا، كانديدات ناۋكتاردىڭ تابىسىنا ءبىر تومەنگى ايلىق ەسەبىندە، ال پروفەسسورلارعا ەكى تومەنگى ايلىق ەسەبىندە اقشا قوسىلادى. بۇدان بولەك سالىقتان جالتارىپ جالاقىنىڭ ءبىر بولىگىن رەسمي تۇردە تومەنگى جالاقى مولشەرىندە، ءبىر بولىگىن قولما-قول بەرەتىن كاسىپورىندار ەسەبىنەن اقشا اينالىمى ءسال ارتاتىنىن وڭ اسەرگە جاتقىزادى ساراپشى.