ستاتيستيكا بيۋروسىنىڭ مالىمەتىنشە، 2022 جىلعى III توقساندا ەلدەگى كەدەيلىك دەڭگەيى 5،3 پايىزدى قۇراعان.
ال 5 جانە ودان دا كوپ ادامنان تۇراتىن جانۇيالار اراسىنداعى كەدەيلىك 9،3%-عا جەتكەن. بۇل – جالپى كەدەيلىك دەڭگەيىنەن 2 ەسەگە جۋىق ارتىق.
كەدەي وتباسىلار كوبىنە تۇركىستان (9،1%)، ماڭعىستاۋ (8،8%) وبلىستارىندا جانە شىمكەنت (7،2%) قالاسىندا تۇرادى.
كەدەيلىك شەگىنە ىلىككەن وتباسىداعى ءار ادام ايىنا 46 671 تەڭگەدەن (ەڭ تومەنگى كۇنكورىس دەڭگەيى) تومەن اقشاعا كۇن كورەدى دەگەن ءسوز.
قارجىگەر جاسۇلان كۋشەبايەۆتىڭ ايتۋىنشا، كەدەيلىكتى انىقتاۋداعى قازاقستان قولداناتىن ءتاسىل كەدەيلىك شەگىن تومەندەتىپ كورسەتەدى، حالىقارالىق ستاندارتقا كەلمەيدى.
– الەمدىك بانك ستاندارتى بويىنشا ازامات كۇنىنە 5،5 دوللاردان از اقشا جاراتاتىن بولسا، وندا كەدەي بولىپ سانالادى. تەڭگەمەن بۇل كۇنىنە 2300 تەڭگە، ايىنا 70 مىڭ تەڭگە. بۇل ەسەپكە ساي، جالاقىسى 70 مىڭ تەڭگەدەن از قازاقستاندىقتار كەدەيشىلىكتە ءومىر ءسۇرىپ جاتقان بولىپ سانالادى. ياعني، ەلدە 2 ميلليوننان استام ادام كەدەي دەگەن ءسوز. ال بىزدە كۇنىنە 1،9 دوللاردان از جۇمسايتىندار عانا كەدەكشىلىك شەگىنە جاتقىزىلادى. مۇنداي مەتوديكامەن ارينە قازاقستاندا كەدەيلەر سانى از بولىپ شىعادى. ءبىز ءوزىمىز ماقسات ەتىپ وتىرعان وزىق وتىزدىققا كىرگىمىز كەلسە، بۇل مەتوديكانى وزگەرۋىمىز كەرەك، – دەيدى ساراپشى.
پىكىر قالدىرۋ