قارجىلىق مونيتورينگ اگەنتتىگى بولات نازاربايەۆتىڭ وڭ قولى دەلىنەتىن، بۇگىندە رەيدەرلىك شابۋىل جاسادى دەپ ايىپتالعان قىلمىستىق توپ مۇشەسى ەلدوس قوسپايەۆ پەن ونىڭ سەنىمدى تۇلعالارىنا قاتىستى تەرگەۋ بارىسى تۋرالى حابارلادى.
اگەنتتىكتىڭ مالىمەتىنشە، 11 ادامنان قۇرالعان قىلمىستىق توپتاعى 5 ادام قاماۋعا الىنعان. ال ەلدوس قوسپايەۆپەن قوسقاندا 6 ادام ءالى ىزدەۋدە. اگەنتتىكتىڭ رەسمي وكىلى قىلمىستىق توپ كاسىپكەرلەرگە رەيدەرلىك شابۋىل جاساپ، مۇلكىن، سەرىكتەستىكتەردەگى ۇلەستەرىن تارتىپ الىپ، كولەڭكەلى كاسىپكەرلىكپەن اينالىسقانىن ايتادى.
"2019 جىلعى 4 ناۋرىزدا الماتى قالاسىندا قوسپايەۆ سىبايلاستارىمەن بىرگە بيزنەستى دامىتۋعا 160 ملن تەڭگە سالعان "Profit Trade Ltd" ج ش س يەلەرىن ۇلەستەرىنىڭ 40%-ىن قىلمىستىق توپتىڭ بەلسەندى مۇشەسى يماشيەۆقا جازىپ بەرۋگە ماجبۇرلەگەن. بۇرىنعى باسشىلاردى باسشىلىقتان الىپ تاستاعان ۇيىمداسقان قىلمىستىق توپ مۇشەلەرى جالعان قۇجات جاساۋ ارقىلى قالعان 35 پايىز ۇلەستى دە يەمدەنىپ العان. اتالعان كومپانيا الكوگول ونىمدەرىن كوتەرمە باعادا ساتۋمەن اينالىسىپ، تۇراقتى تابىس اكەلگەن. بۇدان بولەك، 2020 جىلى 30 شىلدەدە قوسپايەۆتىڭ قىلمىستىق توبى ءوز بيزنەسىنە 400 ملن تەڭگەدەن استام ينۆەستيسيا سالعان "Azovita Aktay" ج ش س مەن "Azovita Atyray" ج ش س مەنشىك يەسىن ومىرىنە ءقاۋىپ ءتوندىرۋ ارقىلى قىلمىستىق توپ مۇشەلەرىنە كاسىپورىنداردىڭ جارعىلىق كاپيتالىنىڭ 100% ۇلەسىن وتەۋسىز بەرۋگە ءماجبۇر ەتكەن. جوعارىدا اتالعان قوسپايەۆ باستاعان ۇيىم كومپانيالاردى باقىلاۋىنا الىپ، ولاردى الماتى، اتىراۋ، قوستاناي، ماڭعىستاۋ وبلىستارىندا، سونداي-اق الماتى قالاسىندا الكوگول ونىمدەرىن زاڭسىز ساتۋعا پايدالانعان" دەلىنگەن قارجىلىق مونيتورينگ اگەنتتىگى تاراتقان اقپاراتتا.
بۇدان بولەك حابارلامادا قىلمىستىق توپ 2021 جىلعى شىلدەدە قاپشاعاي سۋ قويماسىندا "Kapchagai Marina سlub" جشس-عا تيەسىلى قۇنى 2 ملن دوللاردى قۇرايتىن دەمالىس ايماعىن كۇشپەن يەمدەنىپ العانى جازىلعان.
"قوسپايەۆ ءوزىنىڭ سەنىمدى وكىلدەرى – ۇيىمداسقان قىلمىستىق توپ مۇشەلەرى ارقىلى الماتىنىڭ ەڭ بەدەلدى اۋداندارىنىڭ بىرىندەگى "Esentay سity" تۇرعىن ءۇي كەشەنىن سالىپ جاتقان "AV-Construction" جشس-نىڭ 75 پايىز اكسياسىنا يەلىك ەتكەن. ال قالعان 25% بەلگىلى كاسىپكەر ءابدىعاپپاروۆقا تيەسىلى، ول 2016 جىلى ج ش س اتىنان تۇرعىن ءۇي قۇرىلىسىنا 31 گا اۋماقتى ساتىپ العان.
كوسپايەۆ پەن ونىڭ سەرىكتەستەرى بايۋ ماقساتىندا پاتەرلەر مەن كوممەرسيالىق ۇيلەردى تۋىستارىنىڭ اتىنا راسىمدەۋ ارقىلى ج ش س مۇلكىن ۇرلاعان. 2018 جىلدىڭ قازان ايىنان باستاپ قوسپايەۆ پەن ۇقت مۇشەلەرى بابايەۆ، ءابىجانوۆ، تاناشيەۆ، كۋدرياشوۆا جانە باسقا دا تۇلعالار 3 جەر ۋچاسكەسىن، 20 كەڭسە ءۇي-جايىن جانە 113 پاتەردى يەمدەندى. زالال قۇنى 4،6 ملرد تەڭگە.
قوسپايەۆ بىرلەسكەن مەنشىك يەسى ءابدىعاپپاروۆ كومپانيانىڭ مۇلكىن ۇرلاۋعا بايلانىستى شاعىمدانباۋى ءۇشىن ونىڭ اناسى س. جۇنىسبەكوۆاعا رەسىمدەلگەن 25% ۇلەستى الىپ قويۋعا شەشىم قابىلدايدى.
كاسىپكەر ءابدىعاپپاروۆ ۇستالعاننان كەيىن قىلمىستىق توپ مۇشەلەرى كاسىپكەردىڭ اناسى جۇنىسبەكوۆاعا قىسىم جاساعان. جۇنىسبەكوۆا "AV-Construction" جشس-داعى ءوز ۇلەسىن ۇلىن تۇرمەدەن شىعارۋعا ايىرباستاۋعا بەكىنەدى دە ۇيىمداسقان قىلمىس توپ مۇشەلەرىنىڭ شابۋىلىنا توتەپ بەرە الماي، ۇلىنىڭ ءومىرى ءۇشىن قورقىپ، كومپانياداعى ۇلەسىن ەشقانداي وتەۋسىز اۋدارىپ بەرگەن.
تەرگەۋ اياسىندا ۇيىمداسقان قىلمىستىق توپتىڭ قىلمىستىق جولمەن تاپقان 133 جىلجىمايتىن مۇلىك نىسانى، 11 جەر ۋچاسكەسى، 35 پرەميۋم ماركالى اۆتوكولىك جانە 9 ملن دوللار قولما-قول اقشا تاركىلەندى.
سونىمەن قاتار، قوسپايەۆ ەشقانداي قۇجاتسىز الماتى وبلىسىندا باسسەينى، ترەناجەر زالى بار ءساندى ءۇي سالعان. ول اسىل تۇقىمدى جىلقىلار ءوسىرىپ، جابايى جانۋارلاردان حايۋاناتتار باعىن تۇرعىزعان. حايۋاناتتار باعىندا ارىستاندار، ايۋلار جانە باسقا اڭدار بولعان.
ىشكى ىستەر ورگاندارىنا 2018-2021 جىلدار ارالىعىندا وسى ءۇيدىڭ قىزمەتكەرىن ۇقت مۇشەلەرىنىڭ بىرنەشە رەت زورلاۋ فاكتىسى بويىنشا ماتەريال جىبەرىلدى. رەيدەرلىك باسىپ الۋ فاكتىسى جانە ۇقت جۇمىس ىستەۋىنە ىقپال ەتكەن قاتىسۋشى تۇلعالاردى انىقتاۋ بويىنشا سوتقا دەيىنگى تەرگەۋ جالعاسىپ جاتىر" دەدى اگەنتتىكتىڭ رەسمي وكىلى.
بۇعان دەيىن كاسىپكەر، Esentai City جوباسىنىڭ اۆتورى الماس ءابدىعاپپاروۆ Orda.kz سايتىنا بەرگەن سۇحباتىندا "AV-Construction" جشس-دەگى 25 پايىزدىق ۇلەسىن رەيدەرلىك جولمەن بولات نازاربايەۆتىڭ سەنىمدى ادامى ەلدوس قوسپايەۆ تارتىپ العانىن مالىمدەگەن.
كاسىپكەردىڭ ءوزى "اسا ءىرى مولشەردە سەنىپ تاپسىرىلعان بوتەن مۇلكىن يەمدەندى (قىلمىستىق كودەكستىڭ 189-بابى 4-بولىگى 2-تارماعى) دەپ ايىپتالىپ، بيىل شىلدەدە 7 جىلعا باس بوستاندىعىنان ايىرىلعان.
پىكىر قالدىرۋ