بۇگىن الماتىدا ءفيلمنىڭ قازاقشا 30-دان استام سەانسى، استانادا 9 سەانسى كورسەتىلەدى دەپ جوسپارلانعان. بۇل – ورىسشا سەانستارعا قاراعاندا ونداعان ەسەگە از.

 

قازاق ءتىلىنىڭ قولدانىسىن ارتتىرۋدى كوزدەيتىن Instagram-داعى Qazaq grammar جوباسى قازاقشا سەانستاردى كوبەيتۋگە كورەرمەن سۇرانىسى ىقپال ەتە الاتىنىن ايتىپ، كوپشىلىكتى ءفيلمدى قازاقشا كورۋگە، سول ارقىلى قازاق سەانستارىنا باراتىندار كوپ ەكەنىن كورسەتۋگە شاقىرادى.

 

"قازاق كورەرمەنى وسى پرەمەرانى پايدالانىپ، دۋبلياج نارىعىنا ىقپال ەتە الامىز. ياعني ماسەلە مىناداي: قازاقشا دۋبلياجعا كوپ جاعدايدا ادام از بارادى ەكەن-مىس. كينوتەاتر – جەكەمەنشىك كاسىپ بولعاندىقتان، سەانستارىنىڭ ۋاقىتىن سۇرانىسقا قاراي قويادى. سوندىقتان كورسەتىلىمنىڭ قازاقشا نۇسقاسىنا بارىنشا كوبىمىز بارۋىمىز كەرەك. قازاقشاعا سۇرانىس كوپ بولسا، "سىيلاسقاننىڭ سۋىن ءىش" دەپ، كينوتەاتر دا ءبارىن كورەرمەنگە قاراي ىڭعايلاستىرادى. كينوپروكاتتا ءبىرىنشى اپتا اسا ماڭىزدى، ونىڭ ناتيجەسىنە قاراپ، ەكىنشى اپتانىڭ كەستەسىن جاسايدى. ءبىرىنشى اپتادا ءبارىمىز: وتباسى، بالا-شاعا، كورشى-قولاڭ،اۋىل-ايماق بولىپ "اۆاتار: سۋ جولى" ءفيلمىنىڭ قازاقشا سەانستارىنا تويعا بارعانداي جاپپاي اعىلىپ بارايىق"، دەلىنگەن Qazaq grammar پاراقشاسىنداعى ۇندەۋدە.

 

باستامانى قولداپ جازبا استىنا جۇزدەگەن پىكىر جازىلسا، جازبانىڭ ءوزى 7 مىڭعا جۋىق لايك جيناعان.

 

 

قازاقستاندا قازاقشا دۋبلياجداعى گولليۆۋد فيلمدەرى ىڭعايسىز ۋاقىتقا قويىلاتىن نەمەسە قازاقشا سەانس ورىسشاعا اۋىستىرىلاتىن جاعداي ءجيى كەزدەسەدى. كينوتەاترلار مۇنى قازاقشا سەانسقا ادام از كەلەتىنىمەن تۇسىندىرەدى. الايدا بۇل – قازاقشا فيلمدەرگە كورەرمەن بارمايدى دەگەندى بىلدىرمەيدى. ماسەلەن، سوڭعى ءبىر جىلدا تازا قازاقشا تۇسىرىلگەن "قازاقشا بيزنەس تۇركيادا"، "دجوحان" فيلمدەرىنە كورەرمەن كوپ بارىپ، كينوتۋىندىلار كاسسالىق ءتۇسىم بويىنشا كوشباسشىلار قاتارىنا ەنگەن.