قازاق ءتىلى توڭىرەگىندە تاعى دا داۋ. بۇل جولى گۇل ساتاتىن "الماتى بۋكەت" دۇكەنىنىڭ قىزمەتكەرى جادىرا اققايىر ەسىمدى جۋرناليسكە "تولىقتاي قازاقشا قىزمەت كورسەتىلمەسە، تاپسىرىسىمدى كەرى قايتارىڭىزدار" دەگەن ءسوزى ءۇشىن "ءسىز اۋرۋسىز، سىزگە ەمدەلۋ كەرەك" دەپ زەكىگەن.
بۇنى ايگەرىم توقسانبەك ەسىمدى كەلەسى جۋرناليست facebook پاراقشاسىنا سالىپ، وقيعا كوپشىلىك نازارىن اۋداردى. جەلى قولدانۋشىلارىنىڭ ءبىرى بولعان وقيعا بويىنشا قۇزىرلى مەكەمەگە شاعىم ءتۇسىرۋ كەرەگىن ايتسا، ءبىرى دۇكەننەن گۇل ساتىپ الماي، بويكوت جاريالاۋعا شاقىردى. ەندى ءبىرى دۇكەننىڭ وزىنە حابارلاسىپ، نارازىلىق تانىتۋ كەرەك دەپ جاتتى. ءبىراز ادام كەيىنگى ۇسىنىستى ءىلىپ اكەتىپ، دۇكەننىڭ جەلىدەگى پاراقشالارى مەن Whatsapp نومەرىنە نارازىلىق بىلدىرە باستادى.
دۇكەن باسىندا شاعىمدانۋشىلاردى ەلەمەگەندەي بولىپ، instagram-داعى وزدەرى تۋرالى جازىلعان جاعىمسىز پىكىردى ءوشىرىپ، پىكىر يەسىن بۇعاتتاپ وتىرعان.
الايدا ءقازاقتىلدى ازاماتتاردىڭ شاعىمى تولاسسىز جالعاسىپ، اقىرى دەگەنىنە جەتتى.
دۇكەن اكىمشىلىگى الدىمەن قىزمەتكەرى رەنجىتكەن جۋرناليستەن، ارتىنشا Instagram ارقىلى كوپشىلىكتەن كەشىرىم سۇرادى. Instagram پاراقشاداعى اقپاراتتاردى قازاقشالاپ، Whatsapp بوتتى ەكى تىلدە جاۋاپ بەرەتىندەي ەتىپ وزگەرتىپ قويدى. Whatsapp ارقىلى قازاقشا قىزمەت كورسەتۋدى سۇراعان كليەنتكە جىلى عانا قازاقشا جاۋاپ قاتىپ، سۇراعانىن بەرەتىن بولدى.
پىكىر قالدىرۋ