اباي وبلىسى جارما اۋدانىنىڭ ۇشبيىك اۋىلىندا 9-سىنىپتىڭ ەكى وقۋشىسى ءبىر ۋاقىتتا سۋيسيد جاسادى، دەپ حابارلادى Abainewskz Telegram ارناسى. دارىگەرلەر وقۋشىلاردىڭ ءبىرىن قۇتقارىپ قالسا، 15 جاستاعى ايقىن ەسىمدى بالا قازا تاپقان.

ايقىننىڭ سىنىپتاستارى قايعىلى وقيعاعا 11 سىنىپ وقۋشىلارىنىڭ ءجاسوسپىرىمدى بىرنەشە رەت ۇرىپ-سوعىپ، پسيحولوگيالىق قىسىم كورسەتۋى سەبەپ بولۋى مۇمكىن ەكەنىن ايتىپ وتىر. سوزدەرىنشە، مۇعالىمدەر مەن مەكتەپ باسشىلىعى جوعارى سىنىپ وقۋشىلارىنىڭ بۇل ارەكەتىنەن حاباردار بولعان. الايدا ارتىق شۋ شىعارماس ءۇشىن وقيعانى جاسىرۋعا تىرىسقان.

وقيعادان ءبىر كۇن بۇرىن جوعارى سىنىپ وقۋشىلارى كىشى سىنىپ وقۋشىلارىن سوققىعا جىققان. توبەلەس كەزىندە 9-سىنىپ وقۋشىسى اۋىر جاراقات الىپ، اۋرۋحاناعا تۇسكەن. كەلەسى كۇنى 9-سىنىپتىڭ ەكى وقۋشىسى مەكتەپكە بارۋدان ءولىمدى ارتىق كورىپ، ويلارىن ىسكە اسىرماق بولادى. ەكى بوزبالانىڭ ءبىرى قىرشىنىنان قيىلدى.

ايقىننىڭ تۋىستارى ونىڭ تاربيەلى بالا بولعانىن، جاقسى وقىعانىن، قىزىل اتتەستات پەن التىن بەلگىگە ۇمىتكەر بولعانىن ايتىپ وتىر. اتا-انالار كىنالىلەردى زاڭنىڭ بارلىق قاتاڭ تۇرىمەن جازالاۋدى سۇرايدى.