قورعانىس مينيسترلىگى قارجى نارىعىن رەتتەۋ جانە دامىتۋ اگەنتتىگىمەن مەرزىمدى قىزمەتتىڭ ساربازدارىنا "نەسيەلىك دەمالىس" بەرۋ تۋرالى مەموراندۋم بەكىتكەنىن حابارلادى.
قورعانىس ۆەدومستۆوسى بۇل باستاما مەرزىمدى قىزمەتتەگى اسكەري قىزمەتشىلەرگە اسكەري قىزمەت وتكەرۋ كەزەڭىندە نەسيەلەرىن ۇمىتۋعا مۇمكىندىك بەرەتىنىن ايتادى.
"نەسيەلەر بويىنشا تولەمدەردى كەيىنگە قالدىرۋ بارلىق بانكتەرمەن جانە ميكروقارجى ۇيىمدارىمەن ساربازداردىڭ بارلىق اقشالاي قارىزدارىن توقتاتا تۇرۋ كوزدەلەدى. مەموراندۋمدى ىسكە اسىرۋ ءۇشىن قورعانىس مينيسترلىگىنىڭ اگەنتتىكپەن جانە قارجى ۇيىمدارىمەن ءوزارا ءىس-قيمىلىنىڭ ارنايى الگوريتمى ازىرلەندى. وسىعان سايكەس، شاقىرۋ ناۋقانى كەزىندە بولاشاق وتان قورعاۋشىلاردىڭ جينالعان بانكتىك قارىزدارى مەن شاعىن نەسيەلەرى تۋرالى مالىمەتتەر بىردەن قارجى نارىعىن رەتتەۋ جانە دامىتۋ اگەنتتىگىنە جىبەرىلەتىن بولادى. وسى دەرەكتەردىڭ نەگىزىندە كرەديتورلار نەگىزگى بورىش پەن سىياقى بويىنشا تولەمدەردى كەيىنگە قالدىرۋ جانە بەرەشەكتى ءوندىرىپ الۋدىڭ بارلىق نىساندارىن توقتاتا تۇرۋ ماسەلەلەرىن پىسىقتايدى. تولەمدەردى كەيىنگە قالدىرۋ كەزەڭىندە كرەديتور سوتقا بەرۋدى، بەرەشەكتى ءوندىرىپ الۋ ماقساتىمەن اتقارۋشىلىق جازبا جاساۋ ءۇشىن نوتاريۋسقا جۇگىنۋدى، تۇرعىن ءۇيدى ساتۋدى، قارىز الۋشىنىڭ وتباسىن پاتەردەن شىعارۋدى توقتاتا تۇرادى. سونداي-اق، سوت اكتىلەرىنە سايكەس كرەديتور بەرەشەكتى ءوندىرىپ الۋدىڭ بارلىق نىساندارىن توقتاتۋعا مىندەتتەلەدى"دەلىنگەن حابارلامادا.
مەموراندۋم اسكەري بورىشىن وتەپ جۇرگەندەردىڭ قارىزدارى مەن شاعىن نەسيەلەرى بويىنشا مىندەتتەمەلەردى ورىنداي الماۋىنا بايلانىستى تۋىندايتىن الەۋمەتتىك شيەلەنىستى جويۋعا ىقپال ەتەتىن بولادى دەپ كۇتىلىپ وتىر.
پىكىر قالدىرۋ