«الاتاۋ جاستارى» تۇرعىن ءۇي باعدارلاماسىنىڭ قارجىلاندىرىلۋى 3،6 ملرد تەڭگەگە ارتادى. بۇل تۋرالى الماتى وبلىسىنىڭ اكىمى مارات سۇلتانعازييەۆ «زاڭعار» جاستار سىيلىعىن سالتاناتتى تابىستاۋ راسىمىندە ايتتى.

2022 جىلى الماتى وبلىسىندا جاستاردى تۇرعىن ۇيمەن قامتاماسىز ەتۋ ءۇشىن «الاتاۋ جاستارى» باعدارلاماسى ىسكە قوسىلعان. «وتباسى بانكپەن» كەلىسە وتىرىپ، وبلىس كولەمىندە العاشقى جارناسىز 60 پاتەر ساتىپ الۋ ماقساتىندا 600 ملن تەڭگە قارجى قاراستىرىلدى.

«وسى تىڭ جوباعا قاتىسۋ ءۇشىن 1374 ءوتىنىم كەلىپ ءتۇستى. بۇل وتە ۇلكەن كورسەتكىش. سول سەبەپتى، كەلەسى جىلى «الاتاۋ جاستارى» باعدارلاماسىن جۇزەگە اسىرۋعا قاراجات كولەمى 3،6 ملرد. تەڭگەگە دەيىن كوبەيتىلدى. بۇل قارجى 200 پاتەر الۋعا مۇمكىندىك بەرەدى»، – دەدى مارات سۇلتانعازييەۆ.

سونداي-اق ول الەۋمەتتىك سالانىڭ ىشىندەگى ءتۇرلى باعىتتاردى دامىتۋ ءارى جاستاردى قولداۋ ءۇشىن الماتى وبلىسىندا ءبىرقاتار باعدارلاما ىسكە قوسىلعانىن ايتتى. مىسالى، 2022 جىلى العاش رەت جاستاردىڭ بيزنەس، عىلىم، مەديا، مادەنيەت سالالارىنداعى باستامالارىن قولداۋ ماقساتىندا «تاۋەلسىزدىك ۇرپاقتارى» جوباسىن ىسكە اسىرۋ ءۇشىن وبلىستىق بيۋدجەتتەن 15 ملن. تەڭگە ءبولىنىپ، 15 گرانت تاعايىندالدى.

جاستاردىڭ اراسىندا كاسىپكەرلىكتى دامىتۋ ماقساتىندا 2500 ادام «باستاۋ بيزنەس» باعدارلاماسى بويىنشا وقىپ، 382ء-سى گرانت الدى.

«ال «ديپلوممەن – اۋىلعا» باعدارلاماسىنىڭ اياسىندا بيىل وبلىسىمىزدا 631 جاس مامانعا 193 ملن. تەڭگەگە كوتەرمە جاردەماقى تولەنسە، 319 مامان تۇرعىن ءۇي ساتىپ الۋ ءۇشىن 1،5 ملرد. تەڭگەگە جەڭىلدەتىلگەن نەسيە الدى. جاس مامانداردى كاسىبي ەڭبەك جولىنا دايارلاۋدى كوزدەيتىن «جاستار تاجىريبەسى» باعدارلاماسىنا بيىل 902 جاس ازامات قاتىستى»، – دەدى وبلىس اكىمى.