بۇگىن «AMANAT» پارتياسىندا «ۇلى دالا» رەسپۋبليكالىق شىعارماشىلىق بايقاۋى قورىتىندىلاندى. بيىل ادەبي كونكۋرس ۇلى اعارتۋشى، ۇلت ۇستازى احمەت بايتۇرسىن ۇلىنىڭ 150 جىلدىعىنا جانە جازۋشى مۇحتار اۋەزوۆتىڭ 125 جىلدىعىنا ارنالدى.
ءىس-شارانى اشقان «AMANAT» پارتياسىنىڭ ءتوراعاسى ەرلان قوشانوۆ الداعى ۋاقىتتا جوبانىڭ اياسىن كەڭەيتىپ، اۋداندىق، وبلىستىق، سودان كەيىن رەسپۋبليكالىق دەڭگەيدە وتكىزۋدى ۇسىندى. 
«نەبىر تۋما تالانتتار اۋىلداردا ءجۇر. «ۇلى دالا» بايقاۋى سول تالانتتاردىڭ تۇلەپ ۇشار ۇياسىنا اينالۋى ءتيىس. قازاق ادەبيەتىنىڭ كەلەشەگى تەك شىعارماشىلىق قاۋىمدى عانا ەمەس، بارشامىزدى الاڭداتادى. ادەبيەتتىڭ بولاشاعى – ۇلتتىڭ بولاشاعى. سوندىقتان، جاڭا داۋىردە جاڭا ەسىمدەر كەرەك. تەك ولاردى ىزدەپ-تاۋىپ، قامقورلىق كورسەتۋ قاجەت. جاستاردى ىنتالاندىرىپ، جولىن اشۋ ءۇشىن «AMANAT» پارتياسى وسى بايقاۋدى ۇيىمداستىرىپ وتىر»، – دەدى ەرلان قوشانوۆ.
ايتا كەتەيىك، 26 تامىز بەن 10 قاراشا ارالىعىندا بايقاۋعا باس-اياعى 152 شىعارما كەلىپ ءتۇستى. ونىڭ بارلىعى aikyn.kz سايتىندا ارنايى اشىلعان «ۇلى دالا بايقاۋى» ايدارىندا بۇركەنشىك ەسىممەن جاريالانىپ وتىردى.
«تولقىندى تولقىن قۋادى. كەشەگى اعا بۋىننىڭ، بۇگىنگى ورتا بۋىننىڭ ءىزىن جالعايتىن تالانتتارىمىز ادەبيەت ايدىنىندا از ەمەس. سوندىقتان، دارىندى جاستاردىڭ سۋىرىلىپ العا شىعۋى – زاڭدىلىق. بايقاۋدىڭ باستى ماقساتى – جاس قالامگەرلەردى ىنتالاندىرۋ، قاناتتاندىرۋ. سوندىقتان بۇل بايقاۋ الداعى ۋاقىتتا دا جالعاسىن تابادى»، – دەدى ءماجىلىس دەپۋتاتى، قازىلار القاسىنىڭ ءتوراعاسى امانجول ءالتاي.
سونىمەن، «پوەزيا» نوميناسياسى بويىنشا ءبىرىنشى ورىندى اقىن جانىبەك ءاليمان، ەكىنشى ورىندى اقىن شاپاعات ءابدىر ۇلى، ءۇشىنشى ورىندى اقىن تاڭساۋلە اگەن قىزى يەلەندى.
«پروزا» نوميناسياسىندا ءبىرىنشى ورىنعا جازۋشى ءاليحان جاقسىلىق، ەكىنشى ورىنعا جازۋشى ءادىل اۋەزحانوۆ، ءۇشىنشى ورىنعا ۇستاز ايزات راقىشيەۆا لايىقتى دەپ تانىلدى.
«بالالارعا ارنالعان شىعارما» نوميناسياسى بويىنشا ءبىرىنشى ورىندى الپىسباي ءابدىل ۇلى، ەكىنشى ورىندى اقىن قۇرالاي وماروۆا، ءۇشىنشى ورىندى بالالار جازۋشىسى ايسۇلۋ ءالماش قانجىعالادى.
«دراماتۋرگيا» نوميناسياسىندا ءبىرىنشى ورىندى دراماتۋرگ ىقىلاس شالعىنباي، ەكىنشى ورىندى جۋرناليست اقليما ساپاروۆا، ءۇشىنشى ورىندى اقىن ءتوقتارالى تاڭجارىق جەڭىپ الدى.
سونىمەن قاتار، بيىل تۇڭعىش رەت تاعايىندالعان «الاش اماناتى» ارنايى سىيلىعىن الاشتانۋشى-زەرتتەۋشى، بالالار جازۋشىسى ەلدوس توقتارباي، «احمەت بايتۇرسىن ۇلىنىڭ 150 جىلدىعىنا ارنالعان» ارنايى سىيلىقتى اقىن، جازۋشى، كينوسەناريست ۇلاربەك نۇرعالىم ۇلى يەلەندى. ال «مۇحتار اۋەزوۆتىڭ 125 جىلدىعىنا ارنالعان» ارنايى سىيلىقتى جازۋشى اباي ايماعامبەتوۆ جەڭىپ الدى.
«كەز كەلگەن بايقاۋ جارق ەتىپ جاريالانعاندا ەمەس، داستۇرگە اينالعان كەزدە وعان اۆتورلار دايىندىقپەن كەلىپ، ءوز جەمىسىن بەرە باستايدى. بيىل بۇل شىعارماشىلىق بايگە احمەت بايتۇرسىن ۇلىنىڭ 150 جىلدىعىنا ارنالعاننان كەيىن اۆتورلارعا ونىڭ جاۋاپكەرشىلىك جۇگى جەڭىل بولماعانى انىق. ادەبيەت – تۇتاس قوعاممەن ۇشتاسىپ جاتقان دۇنيە. سوندىقتان ادەبيەتتى قولداۋ – تەك رۋحانياتتى قولداۋ ەمەس، جالپى قوعامنىڭ وڭ بەتبۇرىسىنا اسەر ەتۋ دەگەن ءسوز»، – دەدى ۇلاربەك نۇرعالىم ۇلى.
سونداي-اق، پارتيانىڭ ورتالىق اپپاراتىندا وتكەن ءىس-شارادا قوستاناي وبلىسىنىڭ تورعاي اۋىلىنداعى «ا.بايتۇرسىن ۇلى مەن م.دۋلات ۇلىنىڭ ادەبي مۋزەيىنىڭ» قىزمەتكەرلەرى كورمە ۇيىمداستىردى. وندا ۇلت ۇستازى تۇتىنعان زاتتار، قۇندى جادىگەرلەر، قايراتكەر شىعارمالارىنىڭ ءتۇپنۇسقاسى جانە ت.ب زاتتار قويىلدى.
«AMANAT» پارتياسىنىڭ باسپا ءسوز قىزمەتى
پىكىر قالدىرۋ