استانادا بۇرىنعى دەنساۋلىق ساقتاۋ ءمينيسترى ەلجان ءبىرتانوۆتىڭ ءىسى بويىنشا اپپەلياسيالىق وتىرىس كەيىنگە شەگەرىلدى.
"تىڭداۋ كەيىنگە قالدىرىلدى، پروسەسس 27 جەلتوقساندا ساعات 15.00-دە جالعاسادى" دەپ حابارلادى استانا قالالىق سوتى.
28 قازاندا سوت ءبىرتانوۆتى 5 جىلعا، ونىڭ ورىنباسارى ولجاس ابىشيەۆتى 4 جىلعا باس بوستاندىعىن شەكتەۋگە ۇكىم شىعارعان. ەلجان ءبىرتانوۆ "ساناۆياسيانى زاڭسىز پايدالاندى" دەگەن ايىپ بويىنشا اقتالعانىمەن "لاۋازىمىن اسىرا پايدالاندى" دەگەن باپ بويىنشا ايىپتى دەپ تانىلعان. ەكەۋى سوت ۇكىمى بويىنشا "كەلتىرىلگەن" 1 ملرد 350 ملن تەڭگە شىعىندى وتەۋگە مىندەتتەلگەن.
ەلجان ءبىرتانوۆتىڭ ادۆوكاتتارى جوعارى تۇرعان سوت ساتىسىنا №2 سارىارقا سوتىنىڭ ۇكىمىنە اپەللياسيالىق شاعىم تۇسىرگەن. ەكس-مينيستردىڭ قورعاۋشىلارى سوت ۇكىمىنىڭ ونى لاۋازىمدىق وكىلەتتىكتەرىن تەرىس پايدالانعانى ءۇشىن كىنالى دەپ تاپقان بولىگىنە نارازى.
پىكىر قالدىرۋ