بۇگىن ءماجىلىستىڭ جالپى وتىرىسىندا جەرلەردىڭ پايدالانىلۋى مەن قورعالۋى ماسەلەلەرى بويىنشا كەيبىر زاڭنامالىق اكتىلەرگە ەنگىزىلەتىن وزگەرىستەر مەن تولىقتىرۋلار قارالدى. اۋىل شارۋاشىلىعى ءمينيسترى ەربول قاراشوكەيەۆ بيىل 5،2 ملن گەكتار جەر مەملەكەت مەنشىگىنە قايتارىلعانىن ايتتى. دەگەنمەن ءماجىلىس دەپۋتاتتارى بۇعان سەنبەيتىنىن جەتكىزدى. 

"وسكەمەنگە بارساڭىز، جەردىڭ ءبارى دانيال احمەتوۆتىكى، ال پاۆلودارعا بارساڭىز باقاۋوۆتىكى. استانانىڭ ماڭايىندا ءومىرزاق شوكەيەۆتىكى. ونى ايتۋعا ءبارى قورقىپ وتىر. الايدا ءسىزدىڭ بايانداماڭىزدا ايتىلعان مىڭداعان گەكتار جەر قايتارىلدى دەگەن ءسوز – وتىرىك. حالىقتىڭ ءبارى نارازى بولىپ وتىر. مال باعىپ وتىرعاندارعا جەر جەتپەي جاتىر. سىزدەر وسى ادەمى باياندامانىڭ ورنىنا وسىنى قاشان قولعا الاسىزدار. ءاتى-جونىن جازىڭىزدار. تاقتانى ءىلىپ قويۋعا نەگە ۇيالاسىزدار؟ بۇرىنعى وتىرعان بايلار سولاي وتىر"، - دەدى دەپۋتات بەرىك دۇيسەنبينوۆ. 

الايدا مىنبەردە سۇراققا جاۋاپ بەرگەن اۋىل شارۋاشىلىعى ءمينيسترى ەربول قاراشوكەيەۆ دەپۋتاتتىڭ بۇل ويىمەن كەلىسپەيتىنىن جەتكىزدى.

"اكىمدەرگە تيىسپەي، جەرلەردى قورعاپ وتىر دەگەندى مەن قابىلداي المايمىن. سەبەبى 5،2 ملن گەكتار جەردى قايتاردىق. ول كىمنىڭ جەرلەرى؟ سول اكىمدەردىڭ جەرلەرى، وليگارحتاردىڭ جەرلەرى. ەندىگى جىلى دا 5 ملن گەكتار جەردى قايتارامىز. ول جۇمىستى ءقازىر جانداندىرىپ جاتىرمىز. ءبىز زاڭعا سايكەس جۇمىس ىستەيمىز. بار جۇمىستى جوق دەپ ايتۋعا بولمايدى"، - دەپ جاۋاپ بەردى مينيستر.

كەيىن ەربول قاراشوكەيەۆ پەن بەرىك دۇيسەنبينوۆ بىرلەسىپ ايماقتاردى ارالايتىن بولىپ كەلىستى.