قىتايدىڭ سىچۋان پروۆينسياسىندا ءار وتباسىنا رۇقسات ەتىلگەن بالا سانىنا شەكتەۋ الىندى، دەپ حابارلادى BBC Russian.
ۇكىمەت نەكەسىز بالا كوتەرگەن ايەلدەرگە رەسمي تۇردە تىركەلىپ، ەرلى-زايىپتىلار سياقتى بارلىق جەڭىلدىكتى الۋعا مۇمكىندىك بەرۋگە شەشىم قابىلدادى. جۇڭگو زاڭى رەسمي تۇرمىسقا شىقپاعان ايەلدەرگە بالا تۋۋعا تىيىم سالمايدى، ءبىراق زاڭ بويىنشا "انا" ستاتۋسى تەك نەكەدەگى ايەلگە بەرىلەدى.
سونىمەن قاتار جالعىزباستى انالارعا، تۇرمىستاعى ايەلدەرگە بەرىلەتىن جەڭىلدىكتەر قولدانىلمايدى، ءتىپتى جۇمىس بەرۋشى ولاردى كەز كەلگەن ۋاقىتتا جۇمىستان شىعارا الادى.
2023 جىلدىڭ 23 قاڭتارىندا جۇڭگو ۇكىمەتى جاريالاعان ستاتيستيكاعا سايكەس 2022 جىلى قىتايدا 9،56 ميلليون ادام دۇنيەگە كەلىپ، 10،41 ميلليون ادام قايتىس بولعان. بۇل – سوڭعى 60 جىلداعى حالىق سانىنىڭ العاش رەت ازايۋى.
قىتايدا سوڭعى حالىق ساناعى تۋۋ كورسەتكىشتەرى تومەن ەكەنىن كورسەتكەننەن كەيىن دۇنيەگە ءۇشىنشى بالا اكەلۋگە رۇحسات ەتكەن. جاڭا ساياسات ۇلتتىق قارتايۋ پروسەسىنىڭ الدىن الۋدى كوزدەيدى.
2016 جىلى جۇڭگو 1979 جىلدان بەرى قولدانىلعان "ءبىر وتباسى – ءبىر بالا" ساياساتىنان باس تارتىپ، ەكىنشى بالانى تۋۋعا رۇحسات ەتكەن. الايدا جاڭا ساياسات كۇتكەندەگىدەي ناتيجە بەرمەگەن.
ساراپشىلار بۇگىندە ۇلكەن جانۇيانى قالايتىن جاستاردىڭ وتە از ەكەنىن، باۋىرسىز وسكەن، شاعىن وتباسىعا ۇيرەنىپ قالعان قىتايلىقتاردىڭ تۇتاس بۋىنى قالىپتاسقانىن ايتادى. جاستار وتباسىلىق تابىستى بىرنەشە بالا اراسىندا بولگەنشە، ءبىر بالاعا بارىنشا نازار اۋدارۋدى قۇپ كورەدى.
Commerzbank ساراپشىسى حاو چجوۋ Reuters-كە بىلدىرگەن پىكىرىندە "جاستار ارى كەتسە ەكى بالا عانا وسىرگىسى كەلەدى، ماسەلەنىڭ تۇپ-سەبەبى ءومىر ءسۇرۋ قۇنى تىم قىمبات، ال ومىرلىك قىسىم اسا جوعارى بولۋىندا" دەگەن.
قىتايداعى سوڭعى حالىق ساناعى 2020 جىلى 12 ميلليون ءسابي دۇنيەگە كەلگەنىن كورسەتكەن. 2016 جىلى 18 ميلليون نارەستە جارىق دۇنيە ەسىگىن اشقان بولاتىن. سوڭعى كورسەتكىش 1960 جىلدان بەرى تىركەلگەن ەڭ تومەنگى كورسەتكىش بولدى.
مەديا-اناليتيك كەرري اللەننىڭ سوزىنشە، قىتايدا ەڭبەك نارىعىنىڭ قىسقارۋىنان جاستاردىڭ كوبىرەك جۇمىس ىستەۋى قالىپتى جاعدايعا اينالعان. سونداي-اق ەرتە جۇپتاسۋعا قاراعاندا، ءبىلىم الۋ مەن جۇمىستى جالعاستىرۋدى قالايتىن ايەلدەر دە كوبەيە تۇسكەن.
پىكىر قالدىرۋ