تۇركياداعى جەر سىلكىنىسىنەن كەيىن 4 قازاقستاندىق جوعالىپ كەتكەن. بۇل تۋرالى تۇركيانىڭ قازاقستانداعى ەلشىسى ۋفۋك ەكيدجي حابارلادى. الايدا ول بۇل مالىمەت الەۋمەتتىك جەلىدەن الىنعانىن ەسكەرتتى.
"تۇركيادا بولعان جويقىن ءزىلزالا كەزىندە جوعالىپ كەتكەندەر اراسىندا وكىنىشكە قاراي قازاقستان ازاماتتارى دا بار. ءتورت ادام حابار-وشارسىز كەتكەن دەگەن دەرەككە قول جەتكىزدىك. ءبىر جاس قىز، بلوگەر بولۋى مۇمكىن، ادانا قالاسىندا، ءۇش كىسى حاتاي قالاسىندا جوعالعان. الايدا بۇل رەسمي اقپارات دەپ ايتا المايمىن. بىزگە بۇل مالىمەت الەۋمەتتىك جەلىلەردەن بەلگىلى بولدى" دەپ اتاپ ءوتتى توتەنشە جانە وكىلەتتى ەلشى.
ەلشى سونداي-اق جەر سىلكىنىسى بولعان ايماقتارعا 36 مەملەكەتتەن 4 مىڭنان استام قۇتقارۋشى جىبەرىلگەنىن اتاپ ءوتتى.
تۇركيا مەن سيريانىڭ ءبىرقاتار پروۆينسياسىندا قاتتى جەر سىلكىنىسى بولىپ، بۇتىندەي اۋداندار، قالاشىقتار بۇلىنگەن. تابيعي اپاتتان 13،5 ملن تۇرعىنى بار 10 پروۆينسيا زارداپ شەككەن. سوڭعى مالىمەتتەر بويىنشا، قازا بولعاندار سانى قوس ەل بويىنشا 8 مىڭعا جۋىقتاعان.
پىكىر قالدىرۋ