بۇعان دەيىن ماجىلىسكە ماجوريتارلىق ءتارتىپ بويىنشا كانديدات اتانۋعا تىرىسقان ءجۋرناليستى وكرۋگتىك سايلاۋ كوميسسياسى  كونستيتۋسيانىڭ "رەسپۋبليكا اۋماعىندا سوڭعى ون جىلدا تۇراقتى تۇرىپ جاتقان بولۋى كەرەك" دەگەن 51-بابى 4-تارماعىنا ساي ەمەس دەپ، تىركەۋدەن باس تارتقان.

كونستيتۋسيانىڭ ءدال سول بابى مەن تارماعىندا سوڭعى ون جىلدا ەل اۋماعىنىڭ ءبىر جەرىندە تۇراقتى تۇردە تۇرعان بولۋى كەرەك دەگەن تالاپ جوق. ول جەردە "قازاقستان رەسپۋبليكاسىنىڭ ازاماتتىعىندا تۇراتىن جانە ونىڭ اۋماعىندا سوڭعى ون جىلدا تۇراقتى تۇرىپ جاتقان ادام پارلامەنت دەپۋتاتى بولا الادى" دەلىنگەن.

دۋمان مۇحامەدكارىم سايلاۋ كوميسسياسىنىڭ بۇل شەشىمىنە ەش تاڭعالمايتىنىن، ءتىپتى وسىلاي بولارىن بىلگەنىن جەتكىزگەن. دەگەنمەن ول كوميسسيا شەشىمىنە بايلانىستى سوتقا شاعىم تۇسىرەتىنىن اتاپ ءوتىپ، كوميسسيا شەشىمى وزگەرمەسە، قۇجات تاپسىرعان وزگە بەلسەندى ازاماتتارعا اقپاراتتىق تۇرعىدا قولداۋ كورسەتۋگە ءازىر ەكەنىن ايتقان.