ەنەرگەتيكا ءمينيسترى الماسادام ساتقالييەۆ ەنەرگەتيكا مينيسترلىگىنىڭ الدىندا تۇنەگەن مۇنايشىلاردىڭ نارازىلىق اكسياسىن "اجيوتاج جاساپ، نازار اۋدارتۋ ءۇشىن جاسالعان ارەكەت" دەپ باعالادى.
"بۇل – اجيوتاج جاساپ، نازار اۋدارتۋدىڭ قامى. جۇمىسپەن قامتۋدى تالاپ ەتكەن مۇنايشىلارمەن ديالوگ ۇيىمداستىرىلعان بولاتىنبىز. وعان ەڭبەك مينيسترلىگىنىڭ وكىلدەرى مەن ەنەرگەتيكا مينيسترلىگىنىڭ دەپارتامەنت ديرەكتورلارى قاتىستى"– دەدى مينيستر ۇكىمەت وتىرىسىندا.
سونىمەن قاتار، ساتقالييەۆ "وزەنمۇنايگاز" جانە "قازمۇنايگاز" كومپانيالارىنا جۇمىسشىلارمەن ىمىراعا كەلۋدى تاپسىرعانىن ايتتى. ونىڭ ايتۋىنشا، بۇل ماسەلەنى الاڭعا شىقپاي–اق كومپانيالاردىڭ وزدەرى شەشۋى كەرەك.
"دالاعا قونۋ – اركىمنىڭ ءوز تاڭداۋى. مەن جەكە باس مۇددەسى ءۇشىن مۇنايشىلاردى پايدالانىپ، تەندەر ناتيجەسىن داۋلاۋعا تىرىسىپ جاتقان كومپانيا باسشىلىعىنا ەمەس جەكە ادامدارعا توقتالىپ وتكىم كەلەدى. ءبىز ولاردى بارىنشا قورعادىق"– دەپ قورىتىندىلادى ەنەرگەتيكا ءمينيسترى.
سونداي–اق، مينيستر جۇمىسشىلارعا بۇرىنعىسىنان كەم ەمەس جالاقى تولەيتىن باسقا جۇمىس ورىندارى ۇسىنىلعانىن ايتتى. ءبىراق مۇنايشىلار ۇسىنىستان باس تارتقان.
ەسكە سالا كەتەيىك، "وزەنمۇنايگاز" كومپانياسى جاريالاعان تەندەردى "كەزبي" سەرىكتەستىگى جەڭىپ العاندىقتان، "وزەنمۇنايگاز" بەن "بەرالى ماڭعىستاۋ Company" كومپانيالارى اراسىنداعى كەلىسىمشارت توقتاعان بولاتىن. سونىڭ سالدارىنان جۇمىسسىز قالعان مۇنايشىلار نارازىلىققا شىعىپ، استاناداعى ەنەرگەتيكا مينيسترلىگى عيماراتىنىڭ الدىنا تۇنەگەن بولاتىن.
پىكىر قالدىرۋ