بيىل 1 شىلدەدەن باستاپ زەينەتاقى جۇيەسىندەگى ءبىرقاتار جاڭالىقتاردى كوزدەيتىن الەۋمەتتىك كودەكس كۇشىنە ەنەدى. الماتى قالاسىنىڭ وڭىرلىك كوممۋنيكاسيالار قىزمەتىنىڭ بريفينگىنە قاتىسقان ءبىرىڭعاي جيناقتاۋشى زەينەتاقى قورىنىڭ وكىلدەرى ولاردىڭ ەڭ ماڭىزدىلارىنا توقتالدى.
«2023 جىلدىڭ 1 شىلدەسىنەن باستاپ مىندەتتى زەينەتاقى جارنالارى (مزج) جانە مىندەتتى كاسىپتىك زەينەتاقى جارنالارى (مكزج) ەسەبىنەن قالىپتاستىرىلعان زەينەتاقى جيناقتارىن ينۆەستيسيالىق پورتفەلدى باسقارۋشىنىڭ (يپب) سەنىمگەرلىك باسقارۋىنا بەرۋ كەزىندە زەينەتاقى جيناقتارىنىڭ ەڭ تومەنگى جەتكىلىكتىلىك شەگى بۇدان بىلاي ەسكەرىلمەيدى. سالىمشى جوعارىدا اتالعان جيناقتارىنىڭ 50% دەيىن يپب-نىڭ سەنىمگەرلىك باسقارۋىنا بەرۋگە قۇقىلى»، - دەدى «بجزق» اق باسقارما ءتوراعاسى جاپنات قۇرمانوۆ.
ءقازىر نارىقتا وسىنداي بەس كومپانيا جۇمىس ىستەيدى:
• "First Heartland Jusan Invest" اق
• "BCC Invest" اق - "بانك سەنتركرەديت"اق ەنشىلەس ۇيىمى
• "Halyk Global Markets" اق ("قازاقستان حالىق بانكى" اق ەۇ)
• "سەنتراس سەكيۋريتيز" اق
• "Halyk Finance" قازاقستان حالىق بانكى ەۇ" اق.
«زەينەتاقى جيناقتارىنىڭ ساقتالۋىنا مەملەكەتتىك كەپىلدىك ۇلتتىق بانكتىڭ (قرۇب) باسقارۋىنداعى جيناقتار بويىنشا عانا بەرىلەدى. سالىمشى جيناقتاردى ءبىر نەمەسە بىرنەشە يپب-عا اۋدارعان كەزدە جيناقتاردىڭ ساقتالۋى مەن تابىستىلىعىن وسى كومپانيالار قامتاماسىز ەتەدى. سوندىقتان، ءوز جيناقتارىڭىزدى يپب باسقارۋىنا اۋدارماي تۇرىپ، بجزق سايتىنان نارىقتاعى باسقارۋشى كومپانيالاردىڭ قولدانىستاعى تىزبەسىن قاراپ، ولاردىڭ ينۆەستيسيالىق دەكلاراسيالارىن، ينۆەستيسيالىق قىزمەتتەرىنە شولۋلاردى، ينۆەستيسيالاۋ تاجىريبەسى مەن ناتيجەلەرىن زەردەلەپ، تاۋەكەلدەردى باعالاۋعا كەڭەس بەرەمىز»، - دەدى سپيكەر.
سونىمەن بىرگە، زەينەتاقى جيناقتارىن يپب سەنىمگەرلىك باسقارۋىنان ۇلتتىق بانكتىڭ سەنىمگەرلىك باسقارۋىنا قايتارۋ مۇمكىندىگى بەرىلەتىن مەرزىم 2 جىلدان 1 جىلعا دەيىن قىسقارادى.
«بۇعان دەيىن جاسالعان زەينەتاقى اننۋيتەتى شارتى بولعان جاعدايدا، يپب سەنىمگەرلىك باسقارۋىنا بەرۋگە قولجەتىمدى زەينەتاقى جيناقتارىنىڭ مولشەرى وزگەرىسسىز قالادى – سالىمشىنىڭ جزش-داعى زەينەتاقى جيناقتارى سوماسىنىڭ 100%»، - دەدى سپيكەر.
زەينەتاقى جيناقتارىن ءبىر نەمەسە بىرنەشە يپب-عا اۋدارۋ، سونداي-اق، جيناقتاردى ۇلتتىق بانكتىڭ باسقارۋىنا قايتارۋ ءۇشىن سالىمشى بجزق-عا وتىنىشپەن جۇگىنۋى قاجەت. ونى بجزق سايتىنداعى جەكە كابينەت ارقىلى نە بجزق-نىڭ كەز كەلگەن بولىمشەسىنە ءوزى جۇگىنگەن كەزدە بەرۋگە بولادى.
پىكىر قالدىرۋ