20 شىلدەدە تۇركىستان وبلىسى سارىاعاش اۋدانى جىبەك جولى اۋىلىندا كىسى قولىنان ولگەن بەس جاسار ءسابيدىڭ جەتىسىنە جينالعان جۇرت نارازىلىققا شىعىپ، تەرگەۋدى ءادىل وتكىزۋدى تالاپ ەتكەن، دەپ حابارلايدى ازاتتىق.
ءبىر توپ ايەل "پەدوفيلدەرگە ءولىم!"، "ءادىل سوت بولسىن!" دەگەن جازۋى بار پلاكات ۇستاپ، جىبەك جولى اۋىلىنىڭ ىشىمەن ءوتىپ، قازاق-وزبەك شەكارا بەكەتىنە اپاراتىن كۇرە جولدى جاپقان. وقيعا ورنىنا پوليسيا مەن ارنايى جاساق كەلگەن.
جينالعانداردىڭ ايتۋىنشا، قىزدىڭ ولىمىنە بايلانىستى تەرگەۋگە تاعى ءبىر كۇدىكتى شاقىرىلعان، كەيىن ونى بوساتقان. تۇرعىندار "سوت-مەديسينالىق ساراپتاما قورىتىندىسى شىقپاي، كۇدىكتىنى شىعارۋعا بولمايدى" دەپ تالاپ قويعان.
جولدى جاپقان نارازى جۇرتتى ارنايى جاساق اكىمدىك عيماراتىنا كۇشپەن كىرگىزگەن. اكىمدىك وكىلدەرى مەن پوليسيا ايەلدەردىڭ شاعىمىن تىڭداپ، سۇراقتارىنا جاۋاپ بەرەمىز دەگەن. كىسى قولىنان قازا بولعان بالا تۋىسىنىڭ سوزىنشە، ءقازىر اكىمدىك عيماراتىن ارنايى جاساق قورشاپ تۇر.
پىكىر قالدىرۋ