23 تامىز كۇنى ىشكى ىستەر مينيسترلىگى ۇلتتىق قاۋىپسىزدىك كوميتەتىمەن بىرلەسىپ، پروكۋراتۋرانىڭ ۇيلەستىرۋىمەن قاراعاندى وبلىسىنداعى كريمينوگەندىك جاعدايعا تەرىس اسەر ەتەتىن قىلمىستىق توپتى ۇستاۋ بويىنشا كەڭ اۋقىمدى ارنايى وپەراسيا جۇرگىزدى، دەپ حابارلايدى Polisia.kz.
ارنايى وپەراسيا استانا جانە قاراعاندى قالالارىنىڭ اۋماعىندا ءوتتى.
پوليسيانىڭ مالىمەتىنشە، توپ مۇشەلەرىنىڭ تاۋ-كەن ءوندىرۋشى كومپانيالاردىڭ ءبىرىنىڭ تاۋارلىق-ماتەريالدىق قۇندىلىقتارىن ۇرلاۋعا، ەسىرتكى مەن اتىس قارۋىن ساقتاۋعا، سونداي-اق 2022 جىلى قىلمىستىق تەكەتىرەس كەزىندە قاراعاندى تۇرعىنىن ولتىرۋگە وقتالۋ فاكتىسىنە قاتىسى بار ەكەنى انىقتالدى.
وسى قاستاندىقتى جاساماق بولعان توپتىڭ ىقتيمال "كيللەرى" كورشى مەملەكەتتىڭ اۋماعىندا ۇستالدى.
قۇقىق قورعاۋ ورگاندارى 70 ءتىنتۋ ءىس-شاراسىن وتكىزدى. سونىڭ ناتيجەسىندە توعىز قارۋ، 400-گە جۋىق ءوق-دارى، پىشاقتار، راديوستانسيالار، ۇلكەن كولەمدە اقشا جانە باسقا دا زاتتاي دالەلدەمەلەر تابىلىپ، تاركىلەندى.
"پوليسياعا 28 ادام جەتكىزىلدى، ونىڭ ىشىندە توپتىڭ 12 بەلسەندى مۇشەسى ۋاقىتشا ۇستاۋ يزولياتورىنا قامالدى"، - دەپ حابارلادى ىشكى ىستەر مينيسترلىگى ۇيىمداسقان قىلمىسقا قارسى كۇرەس دەپارتامەنتىنىڭ باسقارما باستىعى قۋاندىق الپىس.
قىلمىستىق كودەكستىڭ بىرنەشە بابى بويىنشا سوتقا دەيىنگى تەرگەپ-تەكسەرۋ جۇرگىزىلۋدە، ءتيىستى ساراپتامالار تاعايىندالدى.
پىكىر قالدىرۋ