جانەل شاحان 2023 جىلدىڭ 16 جەلتوقسان كۇنى 1986 جىلعى جەلتوقسان مەن 2011 جىلعى جاڭاوزەن قۇرباندارىن ەسكە الۋ اكسياسىنا شىققانى ءۇشىن 15 تاۋلىككە سوتتالدى. بۇل تۋرالى Oyan Qazaqstan قوزعالىسى الەۋمەتتىك جەلىدەگى پاراقشاسىندا حابارلادى. 

بەلسەندى جانەل شاحان 25 جەلتوقساندا دا شاقىرتۋ العان. الايدا دەنساۋلىق جاعدايىنا بايلانىستى پوليسيا بولىمشەسىنە بارا الماعان.

"16 جەلتوقسان كۇنى مەنىڭ ۇستىمە جاپسىرىلعان ستيكەرلەردە وسىنداي سوزدەر بولعاندىقتان، بۇگىنگى تاڭدا مەنى 15 تاۋلىككە جالا جاۋىپ، قاماپ، بوستاندىعىما ءقاۋىپ كەلتىرىپ جاتىر. ەگەر مەن، قازاقستان ازاماتشاسى، ءوز ەلىمدە، ءوز قالامدا، «مەيرام كۇنى» (بيلىك ايتقانداي) رەسپۋبليكا الاڭىنا شىعا الماسام، سول جەردە تۇرىپ، ءوز پىكىرىمدى بىر-ەكى اۋىز سوزبەن بىلدىرە الماسام، بۇل نەنى بىلدىرەدى؟ بۇل دەگەنىمىز مەنىڭ ەركىن تىنىس الىپ، ەركىن ءومىر سۇرە المايتىنىمدى بىلدىرەدى. ال ەركىندىك – ءار ادام بويىنداعى ەڭ ماڭىزدى قاسيەت"، دەيدى جانەل شاحان. 

ەسكە سالساق، بۇعان دەيىن Oyan، Qazaqstan قوزعالىسىننىڭ بەلسەندىلەرى راۆكات مۇحتاروۆ پەن بوتا ءشارىپجاندى 16 جەلتوقسانداعى اكسياعا قاتىسقانى ءۇشىن 15 تاۋلىككە قاماعان ەدى.