ناۋرىز مەرەكەسى قارساڭىندا قونايەۆ قالاسىندا ناۋرىز-كەرۋەن ءجۇرىپ ءوتتى. كەرۋەن تىزبەگىندە تۇيەلەر، ات اربا، كۇيمەلەر مەن اۆتوكولىكتەر بولدى.

زيالى قاۋىم وكىلدەرى، اقساقالدار، اجەلەر، ەتنو-مادەني بىرلەستىكتەردىڭ وكىلدەرى، تەاتر ارتىستەرى مەن جاستار، ەنگەن كەرۋەنشىلەر اۋەلى الاڭعا جينالدى.

مەرەكەلىك كوش-كەرۋەنىنىڭ شارتتى اتاۋى – «ىنتىماق». ماقساتى – وبلىس حالقىنىڭ تۇتاستىعىن مەن اۋىزبىرشىلىگىن كورسەتۋ. بۇكىل اۋدانداردى قامتيتىن كوشكە 3000 ادام قاتىستى. ءبىر اۋدان – ءبىر كوش. ءار اۋداننىڭ تاريحي، مادەني، گەوگرافيالىق ەرەكشەلىكتەرى ەسكەرىلە وتىرىپ، ءارقايسىسىنا بەلگىلى ءبىر تاقىرىپ بەرىلدى.

كوش - كەرۋەن جول بويى بىر-بىرىنە قوسىلىپ، تولىعىپ وتىردى جانە قازاقتىڭ كوش ءداستۇرى قاتاڭ ساقتالدى.

ورتالىققا كەلىپ جەتكەن كوش-كەرۋەندى ءوڭىر جۇرتشىلىعىمەن بىرگە الماتى وبلىسىنىڭ اكىمى مارات سۇلتانعازييەۆ جانە وبلىستىڭ زيالى قاۋىم وكىلدەرى مەن قۇرمەتتى اقساقالدارى كۇتىپ الدى.

جينالعان كوپشىلىك جىل باسىنىڭ باستى ءدامى – ناۋرىز كوجەدەن ءدام تاتتى. كۇبىدەن تۇسكەن ماي مەن تابادا پىسكەنىستىق نان، باۋىرساقتان اۋىز ءتيدى.

كوشكە كورىسۋ سياقتى داستۇرلەر قامتىلىپ مەرەكەنىڭ ءمانى ودان ءارى اشىلا ءتۇستى. ءار كوشكە 1 مينۋتقا دەيىن ۋاقىت بەرىلىپ،  وزدەرىنە بەرىلگەن تاقىرىپتار بويىنشا ونەرىن كورسەتىپ، يگى شارانىڭ ماڭىزىن ارتتىرا ءتۇستى.

مەرەكەلىك ءىس-شارادا وبلىس اكىمى مارات سۇلتانعازييەۆ​ جۇرتشىلىقتى ۇلىستىڭ ۇلى كۇنىمەن قۇتتىقتاپ، ىزگىنيەتىن ءبىلدىردى.

«قۇرمەتتى جەرلەستەر!

بيىل ناۋرىز مەيرامى قاسيەتتى ورازا ايىنا تۇسپا-تۇس كەلىپ وتىر. بارشا مۇسىلمان قاۋىمىنا تۇتقان ورازانىڭ قابىل بولۋىن تىلەيمىن!

ءاز-ناۋرىز ىنتىماعىمىزدى نىعايتىپ، اسقار اسۋلاردى باعىندىرۋعا جەتەلەي بەرسىن.

ءار شاڭىراققا قۋانىش پەن شاتتىق، مول باقىت اكەلسىن!

ەگەمەندى ەلىمىزدىڭ ىرگەسى بەرىك، مارتەبەسى بيىك، بولاشاعى جارقىن بولسىن!

ۇلىس وڭ بولسىن!

مەيرام قۇتتى بولسىن!»، – دەپ ءدۇيىم جۇرتقا ىزگى نيەتىن ءبىلدىردى.

وسىلايشا ءوڭىردىڭ الەۋمەتتىك-ەكونوميكالىق دامۋىنا ۇلەس قوسىپ جۇرگەن ازاماتتارىن ۇلىستىڭ ۇلى كۇنىندە، «ايماققا ەڭبەگى ءۇشىن» توسبەلگىسىمەن ماراپاتتاپ، ءوزىنىڭ قۇتتىقتاۋ ءسوزىن جاقسى ءبىر سالتاناتتى راسىممەن اياقتادى.

وبلىس باسشىسىنىڭ قۇتتىقتاۋىنان كەيىن «جاڭا كۇن» اتتى پرولوگ باستالادى. 150-200 ادام قاتىساتىن پرولوگ كۇندى قارسى الۋ، كوكتەمنىڭ كەلۋى، تابيعاتتىڭ ويانۋى، قىدىر اتانىڭ باتا بەرۋى سياقتى داستۇرلەردى قامتىدى. تەاترلاندىرىلعان پرولوگ-قويىلىمعا بەلگىلى ءانشى ءمولدىر اۋەلبەكوۆا مەن «راببات» ەتنوتوبى، سونداي-اق 70-كە جۋىق ءبيشى بي بيلەپ، ساحنادا ەرەكشە حالىقتىق مەرەكەنىڭ اتموسفەراسى پايدا بولدى. ارى قاراي كونسەرتتىك باعدارلامادا حالىق ءسۇيىپ تىڭدايتىن «دوس مۇقاسان»، ءابدىجاپپار ءالقوجا، ءشابا ادەنقۇل، ميراس پەن قۇرالاي سياقتى بەلگىلى انشىلەر ءان ايتتى. ال  كەشكى مەرەكەلىك كونسەرتتە ەركەش حاسەن، نۇرسۇلتان نۇربەردييەۆ ت.ب سياقتى جاستاردىڭ سۇيىكتى انشىلەرى ونەر كورسەتىپ كەش كورىگىن قىزدىردى.