سونداي-اق جوسپار بويىنشا 2030 جىلعا دەيىن الماتىدا 296 شاقىرىم BRT جولاعى سالىنادى. ءقازىر قالادا مۇنداي جولدىڭ ۇزىندىعى 8 شاقىرىم عانا. جۇردەك اۆتوبۋس جەلىسى 31 كم ترامۆاي جولى، 4 جاڭا مەترو بەكەتى جانە 3 كولىك توبىن قامتيدى.

BRT جەلىسى مەگاپوليستەگى ءال-فارابي داڭعىلى، ساين كوشەسى، شىعىس اينالما، سەيفۋللين داڭعىلى، دوستىق داڭعىلى، گوگول، ساتبايەۆ جانە شالياپين كوشەلەرىنەن وتەتىنىن سحەمادان  كورۋگە بولادى.

وسى ورايدا، ايتا كەتەتىنى، جوسپار بويىنشا بارلىق جۇمىس ءبىر مەزەتتە جۇرگىزىلمەيدى. ياعني، جوبا ءۇش كەزەڭگە بولىنگەن. ءبىرىنشى كەزەكتە 2024 جىلى رايىمبەك داڭعىلىنىڭ پۋشكيننەن احرەمەنكو كوشەسىنە دەيىنگى بولىگىندە ارنايى جولاق تۇسەدى، ول 2026 جىلعا قاراي الماتىنىڭ باتىس شەكاراسىنداعى «بارلىق» بازارىنا دەيىن سوزىلادى. اۆتوبۋس جەلىسى جول ورتاسىنا، ياعني سول جاق شەتكى جولاققا (وتەگەن باتىردان اۋەزوۆكە دەيىن جانە سەيفۋلليننەن پۋشكينگە دەيىن) جانە جولدىڭ وڭ جاق شەتىنە سىزىلادى.

سونىمەن قاتار رايىمبەك داڭعىلىندا قوعامدىق كولىك جىلدامدىعىن ساعاتىنا 50 كم-گە شەكتەپ، ونداعان جەر ءۇستى جاياۋ جۇرگىنشىلەر وتكەلىن سالادى، 17 باعدارشام مەن 60 بەينەباقىلاۋ كامەراسىن ورناتادى.

باس جوسپاردىڭ ەكىنشى كەزەڭىندە، 2025–2026 جىلدارى 11 كولىك ءدالىزى سالىنادى، ال قالعان 28ء-ى 2027–2030 جىلدارى بوي كوتەرەدى. BRT جەلىسىمەن بىرگە ماماندار قوعامدىق كولىك، LRT جۇمىسىن جاڭارتىپ، مەتروپوليتەندى كەڭەيتەدى. اتاپ ايتقاندا، اباي داڭعىلى مەن ءاشىموۆ قيىلىسىنا جاقىن جەردە ورنالاساتىن «قالقامان» بەكەتى جانە رايىمبەك داڭعىلى بويىنداعى «بارلىق» بازارى ماڭىندا جاڭا بەكەت بولادى. ال قازىرگى تار كوشەگە اۆتوبۋس جولاعىن سالۋعا تىيىم سالاتىن نورما دا وزگەرەدى.