2024 جىلعى ۇلگىدەگى جاڭا ديزاينداعى نومينالى 10 مىڭ تەڭگەلىك "ساق ستيلىندەگى" بانكنوتتار اينالىمعا 28 ماۋسىمنان باستاپ شىعادى. بانكنوتتار جاپپاي قولدانىسقا 2024 جىلعى قىركۇيەكتە بەرىلە باستايدى. "سەبەبى ولاردى ەلىمىزدىڭ بارلىق ايماعىنا جەتكىزۋ ءۇشىن جانە جابدىقتاردى بەيىمدەۋ ءۇشىن قوسىمشا ۋاقىت قاجەت"، - دەپ مالىمدەدى بانك وكىلدەرى.
بانكنوتتاردىڭ ءتۇسى – كۇلگىن-كوك. بانكنوتانىڭ بەت جاعىندا: كوكتە قالىقتاپ ۇشقان قۇسپەن "ءومىر اعاشىنىڭ" بۇتاعى (ەسىك قورعانى، ب. د. د. 5-4 عع.، التىن ادام باس كيىمىنىڭ ءبىر بولىگى، تابيعات پەن نانىم بايلانىسىنىڭ قاسيەتتى ماعىناسى)؛ دنق ءسپيرالىن جانە ادامنىڭ تابيعاتپەن بايلانىسىن بىلدىرەتىن ويۋ-ورنەكپەن ستيلدەندىرىلگەن شەكسىزدىك سيمۆولى؛ ارتەفاكت – تاۋ شىڭىنداعى بارىس بەينەلى اشەكەي (ەسىك قورعانى، ب.ز.د. 5-4 عع.، التىن ادامنىڭ باس كيىمىندەگى دەتال، قار بارىسى – باتىلدىقتىڭ، كۇش پەن سۇلۋلىقتىڭ سيمۆولى).
ارتقى جاعىندا ويۋ-ورنەكپەن بەزەندىرىلگەن قالقان مەن قازاقستاندا مەكەن ەتەتىن بارىس بەينەلەنگەن. نەگىزگى سۋرەتتىڭ ارتىندا دوڭگەلەك پىشىندەس قازاقتىڭ ويۋ-ورنەگى ورنالاسقان. بۇل بەينە مىنا يدەيالاردى بىلدىرەدى:
"قالقان" – قۇندىلىقتاردى قورعاۋ؛ ەجەلگى سيمۆول – الەمنىڭ ءتورت قۇبىلاسى؛ ورتاسىنداعى كۇن بەلگىسى – شىعارماشىلىق قۋات پەن ءومىردىڭ سيمۆولى. سونداي-اق بانكنوتتىڭ سىرت جاعىندا ارتەفاكت، ياعني اۋزىندا گريفوندارى بار بارىستىڭ باسى بەينەلەنگەن (بەرەل قورعاندارى "پاتشالار القابى"، ب.د. د. 8-7 عع.، شقو، بەزەندىرۋ ەلەمەنتى، ماقساتتىلىق پەن كۇشتىڭ سيمۆولى). بانكنوتتىڭ ورتاسىندا فون رەتىندە قازاق ويۋ-ورنەگىندەگى "شەكسىزدىك" كونتۋرى بار. وندا ىلە الاتاۋى تاۋلارىنىڭ لاندشافتى كورىنىس تاپقان.
بانكنوتالاردى ايىرباستاۋ جانە اينالىمدا قاتار ءجۇرۋ كەزەڭىن بەلگىلەۋ ءتارتىبى تۋرالى ۇلتتىق بانك وكىلدەرى اينالىمدا جۇرگەن 2012 جىلعى ۇلگىدەگى نومينالى 10 مىڭ تەڭگەلىك ۇلتتىق ۆاليۋتا بانكنوتتارى ەكى جىل بويى اۋىستىرىلاتىنىن اتاپ ءوتتى. جاڭا جانە ەسكى ۇلگىدەگى بانكنوتالاردىڭ اينالىمدا قاتار ءجۇرۋ كەزەڭى 2024 جىلدىڭ 28 ماۋسىمنان 2026 جىلدىڭ 28 ماۋسىمىنا دەيىنگى ارالىقتى قامتيدى. ول كەزەڭ اياقتالعاننان كەيىن، ياعني 2026 جىلعى 28 ماۋسىمنان باستاپ بارلىق بانك پەن قازپوشتادا ەسكى ۇلگىدەگى بانكنوتالاردى 3 جىل ىشىندە، ياعني 2029 جىلعى 28 ماۋسىمعا دەيىن جاڭا ۇلگىدەگى بانكنوتتارعا ايىرباستاۋعا مۇمكىندىك بار.
پىكىر قالدىرۋ