تۇركى مەملەكەتتەرى ۇيىمىنىڭ (تمۇ) بەيرەسمي سامميتىندە قاسىم-جومارت توقايەۆ "تۇركى ءداۋىرىنىڭ" كۇش الىپ، قۋاتتانا تۇسكەنىن ايتتى.

"ۇيىمنىڭ حالىقارالىق مارتەبەسىن ارتتىرۋعا كۇش سالامىز! بۇل رەتتە "TURKTIME!" ۇرانى اياسىندا ىقپالداستىقتى كەڭەيتۋدى جالعاستىرامىز. بۇعان دەيىن 40-قا جۋىق ءىس-شارا وتكىزدىك. ەلدەرىمىز اراسىنداعى بايلانىستىڭ جاڭا تەتىكتەرى پايدا بولدى. بۇل – الەۋمەتتىك ساياسات، قۇقىق قورعاۋ، ءبىلىم، تەحنولوگيا، يننوۆاسيا جانە ونەركاسىپ سياقتى سالالار. سونداي-اق استانادا، قىركۇيەك ايىندا 5ء-شى دۇنيەجۇزىلىك كوشپەندىلەر ويىندارى وتەدى. بۇل – تۇركى مادەنيەتىن كەڭىنەن دارىپتەيتىن ماڭىزدى ءىس-شارا"، – دەگەن قازاقستان پرەزيدەنتى بارلىق ءتۇبى ءبىر تۇركى ەلدەرىنىڭ كوشباسشىلارىن الداعى قىركۇيەكتە استانادا كەزدەسۋگە شاقىردى.

ايتا كەتۋ كەرەك، قازىرگى كەزدە تۇركى مەملەكەتتەرى ۇيىمىنىڭ (تمۇ) ءتوراعاسى – قازاقستان. "TURKTIME!" دەگەن ۇراندى دا وسى ءتوراعالىق اياسىندا، بىلتىر قازاقستان ۇسىنعان بولاتىن.

2023 جىلعى 3 قاراشادا، ەلوردادا وتكەن تۇركى مەملەكەتتەرى ۇيىمىنىڭ X cامميتىندە قاسىم-جومارت توقايەۆ تۇركى حالىقتارىنىڭ قاسيەتتى قارا شاڭىراعى – قازاقستاندا تۇركى ءداۋىرىنىڭ ورلەۋى كەزەڭىن جاريالادى. تيىسىنشە، ول قازاقستاننىڭ ۇيىمعا ءتوراعالىعى "تۇركى ءداۋىرى!"، ياعني "TURKTIME!" ۇرانىمەن وتەتىنىن مالىمدەدى.