2014 جىلى 11 اقپاننان باستاپ ق ر ۇلتتىق بانكى تەڭگەنىڭ بۇرىنعى دەڭگەيىن ساقتاپ تۇرۋدان باس تارتتى، دەپ حابارلايدى بانكتىڭ باسپا ءسوز قىزمەتى.

"قازاقپارات" ءتىلشىسى جاسۇلان جولدىبايەۆتىڭ حابارلاۋىنشا،  «ۇلتتىق بانك تەڭگە كۋرسىنىڭ جاڭا باعامى 185 اقش دوللارى توڭىرەگىندە بولادى دەپ ەسەپتەيدى. ايىرباس باعامىنىڭ كۇرت جوعارىلاۋىن دەڭگەيلەستىرۋ ساياساتى ارى قاراي جۇرگىزىلەدى. تەڭگە كۋرسىنىڭ ۇزاقمەرزىمدىك ترەندى، ۇلتتىق بانك بۇعان دەيىن حابارلاعانداي، فۋندامەنتالدى ىشكى جانە سىرتقى ماكروەكونوميكالىق فاكتورلارعا قاتىستى بولادى»، - دەلىنگەن حابارلامادا.

سونىمەن قاتار 2014 جىلدىڭ 11 اقپانىنان باستاپ قازاقستان رەسپۋبليكاسى ۇلتتىق بانكى ايىرباس پۋنكتتەرىندەگى شەتەل ۆاليۋتاسىن تەڭگەگە ساتۋ-ساتىپ الۋ بويىنشا مىناداي ءدالىزدى ەنگىزەدى: -اقش دوللارىنا - 2 تەڭگە؛ -ەۋروعا - 3 تەڭگە. «ايىرباستاۋ پۋنكتەرى شەتەل ۆاليۋتالارىنا بانكتەر تاراپىنان دا، ۇلتتىق بانك تاراپىنان دا جەتكىلىكتى دەڭگەيدە قامتاماسىز ەتىلەدى. وڭىرلەردە ورنالاسقان ەكىنشى دەڭگەيلى بانكتەرىنىڭ فيليالدارىندا شەتەل ۆاليۋتالارىنىڭ جەتكىلىكتى قورى ساقتالعان»، دەلىنەدى حابارلامادا.

ۇلتتىق بانكتىڭ حابارلاۋىنشا، تەڭگەنىڭ ديەۆالۆاسياسى ۇلتتىق ۆاليۋتانىڭ سىرتقى باسەكەگە قابىلەتتىلىگىن جوعارىلاتۋعا، ق ر ەكونوميكاسىنىڭ سىرتقى تاۋاراينالىم تەپە-تەڭدىگىن ساقتاۋعا جانە وتاندىق تاۋار وندىرۋشىلەردى قولداۋ ءۇشىن جاسالدى».

ال، باسقا اقپارات كوزدەرىنە سۇيەنسەك، ازاتتىقتىڭ استاناداعى ءتىلشىسى قازاقستانداعى ەكىنشى دارەجەلى بانكتىڭ بىرىندە دوللارعا قاتىستى "ساتۋ - 180، ساتىپ الۋ - 205 تەڭگە" دەپ جازىلعانىن، كەيبىر بانكتەردە دوللاردىڭ قۇنى ازىرگە كورسەتىلمەگەنىن حابارلادى. ازاتتىق ءتىلشىسىنىڭ ايتۋىنشا، كەيبىر ۆاليۋتا ايىرباستاۋ پۋنكتتەرى جابىق تۇرعانىن ايتادى.

سونىمەن  قاتار، كوپشىلىك  اراسىندا دا  بۇل جاڭالىققا  نارازىلار  كوپ. "تەڭگەمەن جيناعان دەپوزيتتەرىنىڭ" شىعىنى تۋرالى وكىنىش بىلدىرگەن. "Facebook جەلىسىندە تەڭگەمەن بەرىلەتىن جالاقىنىڭ دوللار باعامىمەن قايتا ەسەپتەلمەيتىنىن، دوللارمەن العان قارىزدارىن قايتارۋدىڭ ەندى قيىنداي تۇسەتىنىن جازىپ جاتقاندار بار. بىرەۋلەر "ديەۆالۆاسيادان كەيىنگى ينفلياسيا باستالماي تۇرعاندا تەحنيكا مەن تاۋارلاردى ەسكى باعامەن الىپ ۇلگەرۋگە" كەڭەس بەرگەن.

ال، ەندى بىرەۋلەر "تەڭگەمىز قۇنسىزداندى. ال ءبىز "ديزاينى ادەمى" دەپ ماقتانامىز" دەگەن كەكەسىن پىكىرلەر دە  ايتقان.

ءتۇيىن. تەڭگە كۇننەن-كۇنگە قۇنسىزدانىپ  بارادى. تەڭگەنىڭ قۇنى تۇسكەن سايىن،  ىشكى ەكونوميكامىزعا شەتەلدىك سالىمدار باعامى ارتىپ  كەلەدى. بۇل ءۇردىس نارىق ايدىنىنان تەڭگەنى ىسىرىپ  تاستاۋدىڭ  ءبىر امالى  بولماسا يگى. قۇنى جوعالعان تەڭگە بىرتە-بىرتە "كوپىر اقشاعا" اينالماسىنا كىم كەپىل؟