بيىل ماڭعىستاۋ وبلىسىندا بالىقپەن اينالىساتىن 3 كاسىپورىن 45،5 توننا بەكىرە تۇقىمداس جانە جايىن بالىقتارىن ءوسىردى. ال، 2025 جىلى وڭىردە 286 توننا بالىق ءوسىرۋ جوسپارلانۋدا. بۇل تۋرالى وكق وتكەن بريفينگتە ماڭعىستاۋ وبلىسىنىڭ اكىمى نۇرداۋلەت قيلىباي ايتىپ بەردى.

بيىل ءتۇپقاراعان اۋدانىندا بەكىرە بالىعى مەن ۋىلدىرىق وندىرەتىن فەرما سالۋ ءۇشىن 56 گەكتار جەر ۋچاسكەسى بەرىلدى. فەرما قۇرىلىسى 2025 جىلدىڭ باسىندا باستالادى دەپ كۇتىلۋدە. جوبا ىسكە قوسىلعاننان كەيىن 30 تۇراقتى جۇمىس ورنى اشىلادى. ماسەلەن شۆەيساريانىڭ ايگىلى بالىق فەرماسى  باسسەيندە بەكىرە تۇقىمداس بالىق تۇرلەرىن ءوسىرۋ جانە اس ۋىلدىرىعىن ءوندىرۋ جوباسىن ىسكە اسىرادى. جوبا قۇنى قۇنى 4،2 ملرد تەڭگە. ال، قاراقيا اۋدانىندا شايان تارىزدىلەر مەن بالىق ءوسىرۋ جوباسى ىسكە اسىرىلادى.

جالپى 2025-2027 جىلدارى قۇنى 12 ملرد.تەڭگە بولاتىن 8 ينۆەستيسيالىق جوبانى ىسكە اسىرۋ كوزدەلىپ وتىر. ونىڭ ىشىندە ەڭ ءىرىسى – «Organic fish» سەرىكتەستىگىنىڭ تور قورشامادا بەكىرە تۇقىمداس بالىق تۇرلەرىن ءوسىرۋ جوباسى. جوبانىڭ قۋاتى جىلىنا 5 مىڭ توننا، ينۆەستيسيالىق قۇنى 7،4 ملرد تەڭگە.

اتالعان جوبالار ىسكە قوسىلعان جاعدايدا «قازاقستاندا جاسالعان» دەگەن وتاندىق برەند قالىپتاسىپ، ەل نارىعىن جەرگىلىكتى ونىممەن قامتۋ جوسپارلانىپ وتىر.
​ماڭعىستاۋدا 30 جىل ۇزىلىستەن كەيىن كاسىبي بالىق اۋلاۋ شارۋاشىلىعىن دامىتۋ قولعا الىندى. كەڭەس ءداۋىرى كەزىندە قارقىندى دامىپ، كەيىن توقتاپ قالعان بۇل شارۋاشىلىقتى قايتا جاڭعىرتۋ ءۇشىن ءبىرقاتار ينۆەستورلار تارتىلدى. بۇگىنگى كۇنى كاسپييدەن بالىق اۋلايتىن زامانۋي كەمەلەر ساتىپ الىندى. كەلەر جىلى تاعى ءتورت كەمە الۋ جوسپارلانىپ وتىر. وسىلايشا 2025 جىلى تەڭىزدەن 20 مىڭ تونناعا دەيىن بالىق اۋلاۋ كوزدەلۋدە.

ماڭعىستاۋ وبلىسى اكىمىنىڭ باسپا ءسوز قىزمەتى