قاسىم-جومارت توقايەۆ "انا ءتىلى" گازەتىنە بەرگەن كولەمدى سۇقباتىندا تالعارداعى قىلمىستىق وقيعاعا قاتىستى پىكىر ءبىلدىردى.
"قايتالاپ ايتامىن، ەلىمىزدە "زاڭ مەن ءتارتىپ" قاعيداتى مىزعىماستاي ورنىعۋعا ءتيىس. مەن تالعار وقيعاسىنا دەيىن جاريالاعان جولداۋىمدا قۇقىق قورعاۋ ورگاندارىنان قىلمىس پەن قاراقشىلىقتىڭ تامىرىنا بالتا شابۋدى تالاپ ەتتىم.
قاڭتار وقيعاسى كەزىندەگى جاپپاي تارتىپسىزدىكتى قىلمىستىق توپتار جاساعانىن ەستەن شىعارماعان ءجون. مەملەكەت ۇيىمداسقان قىلمىسپەن ىمىراسىز كۇرەس جۇرگىزۋگە شاماسى جەتەتىنىن سوڭعى ەكى جىلدا انىق كورسەتتى. اسا ءقاۋىپتى قىلمىستىق توپتار اشكەرەلەنىپ، قۇرىقتالىپ جاتىر. ولاردىڭ سىبايلاستارى مەن قارجى كوزدەرى دە انىقتالىپ وتىر. بىلتىر 246 ادام قىلمىستىق جاۋاپكەرشىلىككە تارتىلدى. ونىڭ ىشىندە ۇيىمداسقان قىلمىستىق توپتاردىڭ 30 باسشىسى بار. بۇل جۇمىستى مەن ەرەكشە باقىلاۋدا ۇستاپ وتىرمىن"، - دەدى قاسىم-جومارت توقايەۆ.
مەملەكەت باسشىسى تالعاردا وقيعادان كەيىن قۇقىق قورعاۋ ورگاندارى بارلىق قاجەتتى شارالاردى قابىلداعانىن اتاپ ءوتتى. قىلمىسقا كۇدىكتىلەر ۇستالدى، ال تەرگەۋ امالدارى اياقتالۋعا جاقىن. جاقىن ارادا بۇل ءىس بويىنشا سوت وتىرىسى وتەتىنى بەلگىلى بولدى.
پىكىر قالدىرۋ