قىتايدا جوعالعان ءالىمنۇر تۇرعانبايدىڭ ايەلى گۇلداريا شەريزات الماتى سوتى وزىنە ايىپپۇل سالعانىن حابارلادى ازاتتىق راديوسى. ءبىر كۇن بۇرىن گۇلداريا شەريزات بالا-شاعاسىمەن اكىمدىك الدىنا بارىپ، اكىمنىڭ شىعۋىن تالاپ ەتىپ، كۇيەۋىن تاۋىپ بەرۋگە كومەكتەسۋلەرىن سۇراعان. ءبىراق ايتۋىنشا، ونى پوليسيا ۇستاپ الىپ، بىرنەشە ساعات پوليسيادا ۇستاعان.

“ايىپپۇل تولەيتىندەي جاعدايىم جوق، جولداسىمدى ىزدەيمىن بە، الدە ايىپپۇلعا اقشا ىزدەيمىن بە؟ ودانشا قانشا تاۋلىك بولسا دا جاتىپ، سونى وتەپ كەتەيىن” دەسەم “كامەلەت جاسقا تولماعان بالاڭىز بار ەكەن” دەيدى” دەدى ول 7 تامىزدا ازاتتىققا.

سوت 6 تامىزدا ونلاين ءوتىپ، سۋديا الدابەك ونى “بەيبىت جيىن وتكىزۋ ءتارتىبىن بۇزۋ” بابى (488-باپ، 7-بولىك) بويىنشا كىنالى دەپ تانىعان.

سوت شەشىمىندە شەريزاتتىڭ “تاۋەلسىزدىك مونۋمەنتى الدىندا جولداسىنىڭ سۋرەتتەرىن ۇستاپ الىپ، رۇقساتسىز شەرۋ، پيكەت ۇيىمداستىرعانى، وسىلايشا بەيبىت جيىن وتكىزۋ ءتارتىبىن بۇزعانى” جازىلعان. سوتتا شەريزات تاعىلعان ايىپتى مويىنداعان.

48 جاستاعى ءالىمنۇر تۇرعانباي 23 شىلدەدە قىتايعا جۇمىس بابىمەن كەتكەن، سودان بەرى حابار-وشار جوق. ايەلى قاسىندا بولعان ادامدار ونى جۇڭگو شەكاراسىندا پوليسيا ۇستاعانىن ايتقان. تۋىستارى قازاقستان مەن جۇڭگو ورگاندارىنان ماردىمدى جاۋاپ الا الماعان. ءالىمنۇر تۇرعانباي قىتايدان وتباسىمەن بىرگە 2016 جىلى كوشىپ كەلىپ، 2017 جىلى قازاقستان ازاماتتىعىن العان. 

قازاقستان سىرتقى ىستەر مينيسترلىگى جاعدايدان حاباردار ەكەنىن، قىتايعا ساۋال جولداعانىن ايتقان.