ازەربايجان رەسپۋبليكاسىندا ءوتىپ جاتقان تۇركى مەملەكەتتەرى ۇيىمىنىڭ ءحىى سامميتىندە قازاقستان رەسپۋبليكاسىنىڭ پرەزيدەنتى قاسىم-جومارت توقايەۆ ءسوز سويلەپ، تۇركى حالىقتارىنىڭ دوستىق-باۋىرلاستىق قارىم-قاتىناسىنىڭ ماڭىزىنا توقتالدى، سونداي-اق، ءبىرقاتار ناقتى ءارى جۇيەلى ۇسىنىستارىن ورتاعا سالدى.
«ازەربايجاننىڭ ايگىلى اقىنى ءارى وسى تاريحي جەردىڭ تۋماسى باحتيار ۆاحابزادەنىڭ «تۇرىكتىڭ تۇرىككە دۇشپاندىق جاساۋعا حاقىسى جوق!» دەگەن وسيەتى بار. ءبىز اعا بۋىننىڭ ۇلاعاتتى سوزدەرىن جادىمىزدا ساقتاپ، تۇركىلەردىڭ ءتۇبى ءبىر تۋىس، بىرلىگى بەكەم باۋىر ەكەنىن بۇكىل الەمگە پاش ەتىپ كەلەمىز»، - دەدى پرەزيدەنت.
سامميتتە ازەربايجان پرەزيدەنتى يلحام الييەۆ، قىرعىزستان پرەزيدەنتى سادىر جاپاروۆ، تۇركيا پرەزيدەنتى رەجەپ تاييپ ەردوعان، وزبەكستان پرەزيدەنتى شاۆكات ميرزيويەۆ، ماجارستان پرەمەر-مينيسترى ۆيكتور وربان، تۇرىكمەنستان حالك ماسلاحاتىنىڭ ءتوراعاسى گۋربانگۋلى بەردىمۇحامەدوۆ، تۇركى مەملەكەتتەرى ۇيىمىنىڭ باس حاتشىسى كۋبانىچبەك ومىرالييەۆ جانە بايقاۋشى تاراپتاردىڭ باسشىلارى ءسوز سويلەدى.
تۇركى مەملەكەتتەرى ۇيىمىنىڭ ءحىى ءساميتى قورىتىندىسى بويىنشا گابالا دەكلاراسياسى قابىلداندى.
