Bilim mınıstri bolǵaly synnan kóz ashpaǵan Erlan Saǵadıevtiń kezekti bastamasyna depýtattar qarsy shyqty, - dep habarlaıdy «Qamshy» portaly KTK arnasyna silteme jasap.

Elimizdiń bas muǵalimi ýnıversıtet stýdentterine 1991 jyldyń 16 jeltoqsanynan bastalatyn Táýelsiz Qazaqstannyń tarıhyn ǵana oqytýǵa bekinip otyr. Al halyq qalaýlylary Saǵadıev qazaqtyń tereń shejiresin bir kúnde short kespek dep alańdaýly. Májilismender búgin balaǵa ekpe salýdy bızneske aınaldyryp alǵandarǵa da shúılikti. Óıtkeni, tolyq zerttelmegen preparattardy qabyldaǵannan keıin, múgedek bolyp qalǵan ul-qyzdyń sany artyp ketken.   

Búgin jalpy otyrysqa jınalǵan depýtattar ashýly. Olardyń yzasyna tıgen Bilim mınıstriniń kezekti reformasy eken. Májilismender Erlan Saǵadıevtiń «stýdentterge tek táýelsiz Qazaqstan tarıhyn oqytamyn» degen bastamasyna narazy. Bas ustaz tolarsaqtan qan keship, qazaqqa bostandyq alyp bergen ata-babamyzdy jas urpaqtyń sanasynan bir kúnde syzyp tastamaq dep qaýiptenedi depýtattar. Sondyqtan, Bilim mınıstriniń  áli de raıynan qaıtýyn talap etti.

Berik Dúısenbınov, Májilis depýtaty:

-Biz ózimizdiń tól tarıhymyzǵa osynshama ishtarlyq jasap otyrǵanymyzdy túsiný qıyn.Tarıh pánin meılinshe keń kólemde tereńdetip oqytý qajet. Keıbir kórshiles memleket basshylarynyń aýzynan:«Qazaqstanda buryn memlekettilik bolmaǵan» degen sýyq sózderdi estip qalyp jatyrmyz. Eger biz óz tarıhymyzdy bilmesek, basqa memleketterge bizdiń tarıhymyzdy qalaı moıyndatyp, qalaı syılata  alamyz?

Biraq, mınıstrdiń bul janaıqaıǵa qulaq asatyn túri joq. Qazir úsh ýnıversıtette «Táýelsiz Qazaqstan tarıhy» atty jańa pán synaq retinde oqytylyp jatyr. Iaǵnı, ondaǵy stýdentter elimizdiń tek 1991 jyldan bergi shejiresin tanyp-bilýde. Tipti Qazaqstannyń tarıhy memlekettik emtıhannan da alynypty. Depýtattar ótkenimizdi túgendep bolǵan soń, bolashaqtyń máselesine aýysty. «Aq jol» partıasyndaǵylar múgedek balalardyń taǵdyryna alańdap otyr. Aıtýlarynsha, ekpeden keıin maıyp bolyp qalǵan ul-qyzdyń sany artqan. Árbir múgedek úsh balanyń biri dárigerdiń qateliginen densaýlyǵynan aıyrylsa, 3 paıyzy ekpeniń kesirinen jarymjan bolyp qalǵan.

Merýert Qazbekov, Májilis depýtaty:

-Máselen, bizde paıdalanylatyn papıllıomaǵa qarsy preparat tolyq zerttelmegen. Bul dárige AQSH-ta jurt jappaı narazylyq tanytqan bolatyn. Al, mundaı túsiniksiz preparattyń elimizge qalaı ótip ketkeni belgisiz. Árıne, bunyń artynda bireýlerdiń turǵany anyq.

Depýtattardyń búgin aıaq asty ekpege qarsylyq bildirýiniń óz sebebi bar. Óıtkeni, úsh kúnnen keıin emhanalarda túrli aýrýǵa qarsy jappaı ekpe salý naýqany bastalady. Dárini eki aılyq baladan bastap, on altydaǵy jasóspirimderge deıin qabyldaýy tıis. Ekpe memleket esebinen tegin jasalady.

Depýtattar dárigerler balaǵa ekpe salmas buryn, ata-analarǵa mindetti túrde preparattyń keri áseri bolatynyn da eskertýi qajet deıdi. Iaǵnı, úlkender qaýip-qaterden habardar bolǵan soń, jazbasha túrde kelisim berýi tıis. Sondaı-aq, búgin daý týǵyzǵan «Qazaqstannyń tarıhyna» kelsek, májilismender stýdentter túgili, sheteldikterge azamattyq bermes buryn, syrttan kelgenderden el shejiresine qatysty emtıhan qabyldaýdy talap etpek.