Astanadaǵy parlament ǵımaratynyń aldynda qaraǵandylyq belsendi Ǵalymbek Aqylbekov úkimettiń aýyl sharýashylyq jerlerin aýksıon arqyly satý josparyna qarsylyǵyn bildirý úshin jalǵyz adamdyq pıket ótkizdi, - dep habarlaıdy «Qamshy» portaly Azattyqqa silteme jasap.

«Depýtattardyń atyna toptap hat qaldyrýǵa bolmaıdy eken. Sondyqtan tek Muhtar Tinikeevke úndeý jazyp, májilistiń hat bólimine qaldyrdym. Endi sheteldikterge jer satýǵa, jalǵa berýge qarsylyǵymdy osylaı ashyq túrde kórsetkim keldi», - deıdi Ǵalymbek Aqylbekov.

Belsendi parlament pen úkimet úıiniń ortasynda Aqordanyń mańynda «Jer satylmasyn» degen jazýy bar qaǵazdy bes mınýttaı ustap turdy. Osy ýaqyttyń ishinde oǵan arnaıy jasaq kıimindegi qyzmetkerler eskertý jasady. Ǵalymbek Aqylbekov eskertýden keıin qolyndaǵy qaǵazyn jınap qoıýǵa májbúr boldy. Belsendi arnaıy jasaq qyzmetkerlerine jalǵyz adamdyq pıket ótkizý zańǵa qaıshy emestigin túsindirýge tyrysty. Biraq belsendini polısıa kóligi Esil aýdandyq ishki ister bólimine alyp ketti.

2016 jylǵy naýryz aıynyń sońynda ulttyq ekonomıka mınıstri Erbolat Dosaev 1 shildeden bastap Qazaqstandaǵy aýyl sharýashylyǵy jerleriniń aýksıon arqyly satylatyny týraly málimdeme jasaǵan soń bul josparǵa qatysty qoǵamdyq narazylyq jıiledi.