Ál–Farabı atyndaǵy Qazaq ulttyq ýnıversıtetiniń halyqaralyq qatynastar fakúltetinde «Týra bı» sheshendik óner klýby músheleriniń uıymdastyrýymen Qazaqstannyń halyq jazýshysy Ázilhan Nurshaıyqovtyń qyzy Janar Ázilhanqyzy Nurshaıyqovamen kezdesý ótti, - dep habarlaıdy «Qamshy» portaly.

Qalyń qazaqtyń ishinde naǵyz súıispenshilik sezimin túsinetinder, shynymen ǵashyq bola biletinderdiń jastyqqa jastap oqyǵan, mahabbattyń qyzyqqa toly jyldaryn baıan etetin Ázilhan Nurshaıyqov aǵamyzdyń kitaby mahabbat gımnine aınalǵanyna kúmán keltire almaımyz. Ǵashyqtyqty qaǵaz betinde sózdermen órnektep ǵana qoımaı, óz ómirin máńgilik mahabbattyń panasy ete bilgen Áz-aǵanyń jubaıy Halıma Ózbaqanova-Nurshaıyqovamen 54 jyl qol ustasa keshken ǵumyry búgingi jastar úshin úlken ónegege aınalǵanyna bárimiz de kýámiz.

- Adamdar bir-biriniń ómirleri týraly kóbirek bilýi qajet. Áńgime meniń aıaýly ákem men anam týraly bolyp otyrǵanda, olar jaıly sóz qozǵamaýǵa meniń esh quqyǵym joq, - dep bastady áńgimesin Janar Ázilhanqyzy.

Suhbattyń basy Halıma apamyzdyń qıyndyqqa toly balalyǵy týraly áńgimeden bastaldy. Qazaq dalasyndaǵy uly ashtyq jyldarynyń qarsańynda týǵan ol, es bile bastaǵan jasynda ata-anasynan aıyrylyp, jalǵyz sińlisimen qaldy. Artynan ózi balalar úıine, sińlisi Hanymhan – sábıler úıine jiberilgende, odan da kóz jazyp qaldy. Araǵa on jyl sala búkil Keńes jerinde ornaǵan soǵys maıdanyna Halıma da surana bastady.

Ázilhanmen ol 1939 jyly tanysqan. Basynda tek qana dos bolyp júrgen-di. Maıdanda júrip ekeýi hat almasty. Aralaryndaǵy sezim de kezekti hattarmen ulǵaıa berdi. Soǵys aıaqtalǵannan soń, eki maıdanger elge oraldy. 1947 jyly Áz-aǵa men Halıma apanyń 54 jyldyń birlese keshken ómiriniń bastaýy salyndy, ekeýi úılenip, úı boldy.

Halıma týraly: «Ol meniń áıelim ǵana emes, ári enem, ári sheshem, ...  ári redaktorym, ári korektorym, ári aqylshym, ári qosalqy avtorym, ári hatshym, ári kýrerim boldy», - dep jazdy Ázilhan aǵa óz estelikterinde.

Halıma apa joǵaryda atalǵandarmen qatar, kúndelikte ómirde sheber aspaz, keremet tiginshi, aqylgóı dana jáne, árıne, aıaýly ana, ardaqty áje bola bildi. Barlyq adamı qasıetterdi boıyna jınaǵan jan bir sátke de álsizdik, qyzǵanshaqtyq, maqtanshaqtyqqa berilmegen, birer mınýtqa da uıalshaqtyǵyn, jomarttyǵy men bilimge degen qushtarlyǵyn joǵaltqan emes.

Máńgilik mahabbattyń panasyna aınalǵan eki ǵashyq ómirge tórt bala ákeldi, olardyń árqaısysy búginde úlken dúnıeniń «kirpishi bolyp qalanǵan». Óz kezeginde olar da Nurshaıyqovtardyń urpaǵyn jalǵastyrar ul-qyzdardyń áke-anasy, ata-ájesi bolyp otyr.

-Men ata-anamdy maqtan tutamyn. Ákem bir esteliginde anam týraly: «... men ózimdi Petrarka talantymen teńestire almaımyn. Júz ese, tipti myń ese tómen bolarmyn. Biraq, Halımanyń Laýradan bir eli de tómen emes ekenine bás tige alamyn» - dep jazǵan edi. Dál osy joldar ákemniń anama degen mahabbatynyń dáleli bola alady, - dep támamdady óz áńgimesin Janar Ázilhanqyzy.

Bul  kezdesý qatysyp otyrǵan stýdentterdiń árqaısysyna úlken áser syılady. Sońǵy ýaqytta elimizde jańa shańyraq kótergen jastardyń ajyrasýǵa jıi baratyndyǵyn baıqap kelemiz. Sonyń kórinisinde Ázilhan aǵamyz ben Halıma apamyzdyń qol ustasa keshken, qıyndyǵy kóp bolsa da, ózderin berik ustap, mahabbataryn sóndirmeı ótken 54 jyly, naǵyz mahabbattyń tek kitaptarda ǵana emes, ómirde de bolatyndyǵyna kóz jetkizýimizge kómektesti. Qandaı qıynshylyq bolmasa da, máńgilik mahabbatqa esh kedergi joq ekenin túsindik.

Janar Ázilhanqyzy bizdiń Qazaq ulttyq ýnıversıtetimizdiń shetel azamattaryna arnalǵan daıyndyq fakúltetinde orys tili kafedrasynyń profesory bolyp qyzmet etetinin bilgen ýaqytta, taǵy bir qýanyshqa bólendik. Ázilhan Nurshaıyqovtaı bıik tulǵa urpaqtarynyń aramyzda júrgeni, onyń ónegeli ómiri týraly molyraq bilý múmkindigi janymyzdy jylyta tústi.

Elbasy Nursultan Ábishuly Ázilhan aǵamyzdyń aıaýly jary týraly jazǵan «Máńgilik mahabbat jyry» atty estelikterin oqyǵannan soń, «Sizdiń shyǵarmalaryńyz, oılaryńyz – el qazynasy. Ómirińiz – úlgi!» dep oı qorytqan eken. Shynymen de, uly tulǵalardyń ómiri – biz, jastar, úshin ulaǵat!Osyndaı janǵa jaıly , tárbıelik máni zor jyly kezdesý jalǵasyn taba berse degen nıettemiz.