Astana kúnine oraı Elordada ótken "Baǵanaly ordam-Basty ordam" atty aıtysta Bolatbek Orazbaevtyń Aıbek Qalıevpen aıtysynda aıtqan bir qaıyrymynan kelesi úzindini usynamyz.

Aınalaıyn Aıeke,

Jastarǵa artsań senimdi

Jyrlaýdan nesin arlanam,

Qazaqty jyrlap bereıin. 

Aǵajan qulaq sal maǵan

Mańǵystaý meniń mań dalam.

Saryarqam meniń sary dalam,

Kósilip jatqan kók teńiz

Qazynasy mol qart Kaspıı

Ortaımaǵan qaýǵadan. 

Asaý tolqyn aq Jaıyq

Asyp tasqan arnadan .

Sulý Kókshe seksen kól, 

Aq ordasyn tiktegen.

Abylaıdaı han babam

Ulytaý uly mekenim. 

Áni ketpegen tórinen

Dáni ketpegen qambadan. 

Altyn ordam Astanam

Kók baıraǵy jelbirep, 

Kóginde qyran samǵaǵan.

Altyn basqan baýyryna

Tarbaǵataı Altaıdyń

Tabıǵatyna tańdanam. 

Jerinde bar jeti ózen

Jeruıyǵym jetisý, 

Kórki kózdi arbaǵan. 

Aıbary bıik alataý

Qaraǵan adam shyńyna, 

Qalpaǵy túspeı qalmaǵan. 

Qaıǵy kórgen Qarataý

Tarıhyn tanyp bilesiń, 

Tasyna túsken tańbadan.

Qazyǵy jurttyń Qazyǵurt

Basqadan artyq bar baǵań.

Ejelgi qonys Túrkistan,

Eki dúnıeni jalǵaǵan. 

Astanam bolǵan Aqmeshit,

Ataqty Asan qaıǵynyń

Atany shógip aýnaǵan. 

Elbasy bir kez shekara

Bolmaǵan dep qazaqta. 

Astarly sózin arnaǵan

Túısikgi tómen keı jandar, 

Túsinbeı jatyp taldaǵan.

Arydan tartyp aıtaıyn

Astaryn kim bar ańdaǵan. 

Jumyr jerdiń betinde

Topyraq joq qazaqtyń, 

Tabany tıip barmaǵan, 

Edil bop turǵan shaǵymda

Eýropany jaýlaǵam. 

Tulpary taptap túrkiniń

Sham dalasyn shańdaǵan. 

Baǵdatty bılep qos ǵasyr

Basyna saldym zar zaman. 

Maǵolstan bop turǵanda

Úndistan Pákistandy da

Bıligimde ustap barlaǵam. 

Aýǵanystannyń jerin de

Ýysymda qarmaǵam. 

Qan qustyrdym Kavkazǵa

Qamalym bar ma almaǵan. 

Beıjindi shapqan bul qazaq

Buǵalyq kimge salmaǵan. 

Baıqadyńdar ǵoı aǵaıyn,

Bári bizdiki bolǵan soń. 

Elbasy ózi aıtqandaı

Shekara bizde bolmaǵan. 

Ushynda turǵan naızamnyń, 

Ushy qıyrsyz bar ǵalam. 

Aıtyp aıtpaı nemene

Sheksiz de shetsiz álemdi,

Qınalmaı qazaq sharlaǵan. 

Osylardyń barlyǵy

Bolsa da qazir túgeldeı,

Qanjyǵamda qalmaǵan. 

Teńdigimdi alǵaly, 

Turaǵym bútin tańdaǵan. 

Baıandy qylsyn árdaıym

Baǵymdy basqa ornaǵan. 

Qos múshelge kelgen elimdi

Qos dúnıede baqytty et

Bar tilegim sol Alladan.

Astana seni jyr etsem,.

Qadiri bıik han tórim

Aqıyq qyp seni túletken

Alataýdaǵy qart elim. 

Aqyńyńdy endi tyńdasań,

Aıtatyn saǵan bar sózim

Jahandy tańdaı qaqtyrǵan. 

Jaqsylyqqa árkez jarshy ediń

As beresiń asta tók.

Altynshy aı saıyn aǵylyp

Aqynyń menen sal seriń

Shetelden nebir ánshini

At jiberip aldyryp. 

Atan soıyp qaldyryp

Tarqatamyn dep jan sherin,

Jarylqaǵan jat jurtty.

Jany jomart márt ediń

Shapan jaýyp solarǵa

Sáıgúligińdi mingizdiń. 

Saýyry jazyq salpy erin

Qansha toılasań óziń bil, 

Qarjynyń orynyn jabam dep

Halyqtyń syqpa qan sólin

Eshki kemirip ketken soń

Tal kóredi tálkegin

Siltenbese eken elime

Sendegi dyraý qamshy órim. 

Jaıly bol jurtqa Aqorda

Jeti jarǵysyndaı Táýkeniń

Tizginin ustap bul jurttyń,

Tórde otyr qasqa qyl myqtym

Kindigine qada qaqqanbyz. 

Azıadaı alyp qurlyqtyń

Halyqqa syılap qýanysh, 

Tarıhqa tamyr súńgittiń.

Alǵa tartyp kelesiń

Arbasyn súırep tirliktiń.

Attanar sátte sózim sol

Astanasy óziń bol

Aqıqat pen shyndyqtyń

Bereke men birliktiń

Aqynyńnyń osy tilegi

Eńseli jurty bolǵaısyń

Eki myńynshy jyldyqtyń.

Bolatbek Orazbaev