Almaty qalalyq İİD basshysy Serik Kúdebaev Instagramda esirtkiniń jáne ıne salynǵan qoldyń sýreti bar kontentti anyqtaýdy tapsyrdy, - dep habarlaıdy Qamshy.kz Tengrinews.kz -ke silteme jasap.

Qalalyq İİD resmı ókili Saltanat Ázirbektiń aıtýynsha Instagram qoldanýshysynyń materıaldaryn polıseıler zerttep jatyr. 

"Basshylyqtyń tapsyrmasymen atalǵan qyzdyń Instagram áleýmettik jelisindegi málimetterdi tekserý jáne zerdeleýdi Almaty qalasynyń ishki ister departamentiniń jedel áreket etý bólimine tapsyrylǵan. Tekseris qorytyndysy boıynsha quqyqtyq baǵa beriledi. Eger qoldanýshy esirtki qabyldap, ony áleýmettik jelide jarıalaǵan bolsa, onda ol adam jazalanatyn bolady", - dedi Ázirbek. Onyń aıtýynsha tekseris qorytyndysy boıynsha júzdegen adam shaǵymdanǵan qyzdyń áreketi esirtkini nasıhattaý bolyp tabyla ma, joq pa degen máselege qatysty sheshim shyǵarylady.

Aıta keteıik, qyzdyń ózi ashyq túrde esirtki qabyldaıtynyn moıyndap, áleýmettik jelige ıneli shprıspen ekpe salynǵan qoldy júktegen. Akkaýyntynda qyz óziniń tártipsiz ekenin jáne Almatydaǵy klýbtarǵa jıi baratynyn jazady.