Bular qarý kezenip, ońdy-soldy nege oq atyp júr?
Menińshe, buǵan eń aldymen jastar keleshegine senimdi bolýy úshin laıyqty jumys, baspana jáne basqasymen qamtamasyz ete almaǵan memleketimiz kináli.
Ekinshiden, IMAMDARYMYZ ben QAZAQSTAN MUSYLMANDARYNYŃ DİNI BASQARMASYNYŃ úlken kinási. Táýelsizdik jyldary meshittiń sanyn kóbeıttik ras, baqandaı 2 myńǵa jetkizdik !!! Tek meshitti kóbeıtkenimizben sol minájat úıleri ishine Senim dánin sebe aldyq pa?! Osy jyldardyń bederinde jamaǵat aldyna erkin shyǵyp, qıyn uǵymdardy qarapaıym tilmen tápsirlep, týra jolǵa jón siltegen birde-bir Múftıdi kórgem joq. Bul bul ma, búkil bizdegi Múftıat júıesi tutastaı jeń ushynan jalǵasyp, qoǵamdy jegideı jep jatqan JEMQORLYQ, PARAQORLYQ jáne zańdastyrylǵan BOPSALAÝMEN ábden shyrmalǵan.
Sózim jalań bolmas úshin dálel keltireıin. Otbasyda bireý qaıtys boldy delik. Túrkıada máselen, ımam qaıtys bolǵan úıge ózi barady. Janazasyn shyǵaryp, materıaldyq kómek, jylý qajet bolsa, ony da suraıdy. Jylý qajetsingen muqtaj jannyń shyǵyndarynyń qomaqty bóligin meshit kóteredi. Eshkim eshkimge ýmajdalǵan aqsha tyqpalamaıdy. Óıtkeni, ol jaqta qaıǵy shegip otyrǵan adamǵa naǵyz ımamdar kómekke keledi, shynaıy Senim syılaıdy. Bizde bolsa bári kerisinshe. Aldymen meshitke barý kerek, ımamdy kóndirý kerek, alyp ketý-alyp barý, tórge otyrǵyzý, etke toltyryp, paket usyný, qaltasyna aqsha salý. Munyń bári Islamǵa úsh qaınasa sorpasy qosylmaıtyn dóreki joralǵylar dep bilemin.
Budan bólek, taǵy da sol Túrkıa men Saýdıtterde sý apaty, zilzala sıaqty tabıǵı apattar bolǵan jaǵdaıda tótenshe jaǵdaı jónindegi qyzmetpen birge moldalar da qosa keledi. Jurtqa tamaq úlestirip, mal-múlik úlestiredi. Bizdiń jalǵan moldalarǵa mundaı izgi is bastaryna kirip te shyqpaıdy. Osydan jeti jyl buryn men KTK arnasynda jýrnalısik zertteý uıymdastyrdym. Bizdiń Dinı basqarma nemen aınalysady? degen máseleni kóterip, musylmandar beretin sadaqa qalaı jumsalatynyn zerttedik. Taǵy da sol Túrkıada kez-kelgen sadaqaǵa fıskaldy chek qosa júredi. Árbir jumada meshit ımamy juma-namazda jamaǵatqa bir aptada qansha soma jınalǵanyn habarlap, ujymmen birge onyń qaıda jumasalatyny týraly sheshim qabyldaıdy. Onyń basym bóligi qaıyrymdylyqqa, al qalǵany muqtaj jandarǵa ataýly kómek retinde beriledi.
Sol tusta men menshikti tilshilerimizge oblystardaǵy meshitterge baryp, kameralar kózinshe sadaqa jınalǵan jáshikterdegi aqshany sanaý sátin túsirip alýdy suradym. Qazirgideı esimde, jeti birdeı oblystaǵy tilshilerimizge bulaı jasaýǵa ruqsat bergen joq. Tek Aqtóbede aldynda ǵana ımam kelisken sıaqty edi, alaıda keshkisin kameramen barǵanda aınyp shyǵa keldi. Aıtýynsha, dinı basqarmadaǵylar telefon soǵyp, túsirilim jasalsa, ımam jumyssyz qalatynyn qatań eskertken eken.
Osylaı bolǵasyn, sadaqa, pitir men basqa da qaıyrymdylyqtardyń esep-qısabyn ózimizshe júrgizip kórdik. Eń bir qarapaıym eseptegenniń ózinde meshitterimizdiń jyldyq aınalymy 70 mıllıon dollardan kem emes boldy. Halyq sany az bizdiń el úshin bul qyrýar qarjy. Dinı basqarmanyń barlyq shyǵyny bul somanyń úshten birin de quramaıdy dep oılaımyn. Qalǵanynyń barlyǵy shyn muqtaj jandarǵa jumsalsa bolýshy edi. Alaıda ózbasym osy jyldardyń ishinde ımamdardyń bireýge úı salyp berip, bireýdiń oqýyn tólep bergenin estimeppin.
Bul Múftıat emes, vertıkal boıynsha jolǵa qoıylǵan jemqorlyq pıramıdasy. Muny men ǵana emes, júzdegen balalar da túsinedi. Olar mármármen aptalyp, kúmbezin altyn jalatqan munaraly saraılardan senim taba almaı qynjylyp, ózge dúmshe dinderge urynyp qalyp jatýy da sodan. Osy jaǵdaı ózgermeıinshe, sálafıtter qaptaǵan ústine qaptaı beredi.
Aǵynan jarylǵandaǵy sózim osy.
Arman Shoraev, Feısbýk paraqshasynan alyndy.
