«Halyq» gazetiniń aıtysynda elge tanylyp, halyqtyń ulyna aınalǵa­n Meıirbek Sultanhan – búginde toqymyna ter qatpaǵan tulparlardyń biri. Úlkendermen úzeńgiles júrgen Syrdyń sary balasy alty Alashty aýyzyna qaratqan aıtysker aqyn atandy. Sózi ótkir, oıy saq Sultanhannyń nemeresimen sársenbide suhbattasýdyń sáti túsken edi. Shaıyrmen bolǵan shynaıy shúıirkeleske kóz júgirtseńiz, sahnada aıtylmaıtyn áńgimeler men siz bilmeıtin qyrlaryna qanyǵasyz.

- Meıirbek, aıtystyń júgi aýyr. Óleńge ózekti qaıdan tabasyń? Qulaǵyń ósek sózge de, kesek sózge de túrik júretin bolar?

- Aıtys – babalarymyzdan muraǵa qalǵan ulttyq qundylyq­tarymyzdyń biri. Tóbemizge kóteretin tól óneri­miz. Sondyqtan aıtys­tyń amanatyn, aqyndyqtyń aýyr júgin barynsha seziný­ge tyrysamyn. Kenen atamyzdyń aıtatyny bar: «Bas ta óleń, qulaq ta óleń, muryn da óleń, Bir aqyn ólse talaı qyryldy óleń» dep. Sol sekildi aqynnyń óleńine ózek qaı kezde de tabylady. Isa Baızaqovtyń bir pyshaq­tyń ózin birneshe saǵat jyrlaýy sol aqynnyń sheberligin, tap­qyrlyǵyn, oıynyń ushqyrlyǵyn kórsetedi. Sondyqtan aqynǵa jyrlaı bilse, taqyryp jeterlik. «Aqynnyń qulaǵy ózinen elý jyl erte týady» degen sóz bar. Shynynda da bizdiń qulaǵymyz bárine túrik júredi. Biraq ósek sóz emes, siz aıtqandaı kesek sóz aıtý – bizdiń mindetimiz. Qoǵamdaǵy túrli jaıttar qaýzaýǵa turarlyq. Alaıda aqynnyń eń aldymen aıtar oıyn aqylǵa salyp, saraptaı bilýi paıym-parasatyna baılanysty. Aıtyl­ǵan ósek áńgimeniń barlyǵy el aldynda aıtýǵa kelmeıtin dúnıe. Aqparat­tyq qoǵamda aıqaılaǵan taqyryp­ pen túrli aqparattar áleýmettik jeli men saıttarda tolyp júr. Al onyń anyq-qanyǵy keıin jazylyp jatady. Súzgiden ótpegen aqpar sahnad­a aıtylsa, onda aıtystyń da, aqynnyń da quny qalmaıdy. Ár sózin kıeli, júıeli tizip, salmaqty, salıqaly­ sóz aıtý - aqynnyń mindeti.

- Aqyndardy ár jerde arnaıy arnaý­ aıtýǵa shaqyrady. Qur maqtanmen «maqtansúıer basshylardy» marqa­ıtyp júrgen joqsyń ba?

- Aqyndardy ár óńirge arnaý aıtýǵ­a shaqyratyny ras. Merekelik jıyndarǵa, qurmetti kisiler kelgende qolqa jasaıtyn kezder kóptep kezdesedi. Biraq sonyń barlyǵyna aqynmyn dep qolyma dombyramdy alyp, shaba berýim shart emes dep bilemin. Óıtkeni adamnyń óziniń jan dúnıesi, júrek qalaýy bolmaǵan jerde táýir óleń shyǵýy múmkin emes. Keıde ónerdi, óleńdi túsinbeıtin adamdardyń aldynda­ arnaý aıtýǵa shaqyratyndar bar. Óz basym ondaı resmı sharalardan boıymdy aýlaq ustaýǵa tyrysamyn. Bir jıynǵa shaqyryp, «arnaýyńnyń arasyna oryssha sózder qosa alasy­ń ba?» degeni bar. Nege desem, «keleti­n qonaq ta túsinip otyrsyn» deıdi. Birden bas tarttym. Sebebi, ónerimdi, tilimdi túsinbeıtin adamnyń kóńiline qarap, aqyndyq, adamdyq bedeli­mdi túsirgim kelmedi. Biraq reti kelse, toıdan bas tartqan qazaq emespin. Jasyratyny joq, toı - bizdiń aıtystan keıingi tabys kózimiz. Ol jaqqa barǵanda árkimdi maqtap emes, toı ıeleriniń qýanyshyna ortaq­tasyp, shańyraq quryp jatqan jastar­ǵa ne mereıtoı ıesine aqjarma, aq kóńilmen tilek aıtamyz. Halyqtyń qýanyshyn aqynmen bólisýi - qazaqtyń burynnan kele jatqan dástúri.

- El «din» dep dúrlikkende, «jer» dep janushyrǵanda aqyndar ún qosty ma?

- Elimizde «din», «jer» máselesi sońǵy kezde halyqty tolǵandyrǵan, tolqytqan jaǵdaı boldy. Aqtóbede, Almatyda bolǵan teraktiler - bul bizdiń qoı terisin jamylǵan qasqyrlarǵa uqsaǵan, mysyqtileý mısıonerlerdiń jasaǵan aram pıǵyldarynyń biri. Sondyqtan bul jaıǵa beıjaı qaramaý kerek. Jer - bizge babal­arymyzdan qalǵan mıras. Jer jaıynda aqyndardyń jaq ashpaı qalýy múmkin emes. Bul másele buǵan deıingi aıtystarda da aıtylyp júrdi. 2010 jyly «Til kespek joq» aıtysynda Aıbek Qalıev­ aǵamyz «Qazaq jeri saıqaldyń qoıny emes qoı, Árkim bir kep jatatyn tósegi­ne» degen edi. Árıne, janǵa batatyn­ teńeý, biraq aqıqaty solaı. Men 2015 jylǵy «Alty­n dombyra» jarysyn­da jer máselesin kóterip, Ermekovti erekshe aıtqan edim.

Bas jarylsa bylǵaıdy bórik ishin,

Baǵyń taısa tógiler mol yrysyń.

Atalar as ústinde attan salǵan,

Qan berip qarys, súıem jeriń úshin.

Babalaryń qaldyrǵan baıtaq jerdi,

Baryńdy sal qyzǵyshtaı qorý úshin.

Qabanbaı qara jerdi qorǵaǵan joq,

Qysylǵanda qytaıǵa berý úshin.

Alashtyń arda týǵan arystary,

Aıanbap ed soıylyńdy soǵý úshin.

Álimxan Ermekovti aıtý kerek,

Erliktiń jasap ketken eń irisin.

Lenınmen betpe-bet sóılesipti,

Shekarańdy bekitip, bólý úshin.

Qazaqtyń menshigine alyp qalǵan,

Orysqa ketip jatqan oblysyn.

Álimxan Ermekovti umytpaıyq,

Taǵdyry taýqymetke toly kisiń.

Al bul kúni qoǵamǵa qarap tursań,

Kóresiń kóp shıkilik kórinisin.

Keleshekte bolady kim jaýapty,

Kelimsekke taptatqan tóriń úshin.

Qytaıǵa ketip jatqan munaımenen,

Úndige ketip jatqan kómir úshin.

Evreı enshi salǵan kólińmenen,

Káriske ketip jatqan keniń úshin.

Qazaǵym, esińdi jı, eńse tikte,

Bireýdiń jaltaqtamaı kóńili úshin.

Ermekov shekarańdy ap qalǵan joq,

Erikkenniń ermegi bolý úshin.

Jer máselesine kelgende biz Álimhan Ermekov pen Jumabek Táshenovtiń erligin eshqashan umytpaýymyz kerek. Qazaqtyń shekarasyn shegendep, bizge osyndaı ulan-ǵaıyr jerdiń qalýyna baıaǵy batyr babalarymyzdan keıin eńbek sińirgen eleýli eki qaıratker osy kisiler. Ermekov pen Táshenovti esten shyǵaryp jatqan tustarymyz kóp. Biraq bizdiń qoǵamnyń ózi osyǵan jetelep otyr. Óıtkeni el úshin eńbek etken saıası tulǵalardan qazirgi «shoý juldyzdary» tanymal. Tursynbek Kákishovtiń ómirden ozǵanyn bilmese de, Tursynbek Qabatovtyń árbir ázilin kútip júretin jas­tardyń qarasy qalyń. ...Jurt jer, din dep dúrligip jatqanda, aqynda­r B.Esentaevanyń jaǵdaıyn jyrlamaǵany belgili. Negizi jer máselesine tek aqyndar emes, keýdesinde qazaq dep soqqan júregi bar árbir azamattyń oılanýy, ún qosýy tıis. Aqyndar ún qospady, aqyndar buqty degen kereǵar pikirge kelispeımin. Aqynnyń maqsaty - kópirip maqtap, kólik miný emes, buqara men bılikke kópir bolý.

- Qazirgi eldegi saıası aýys-túıis­ke qandaı baǵa beresiń?

- Eldegi aýys-túıister eshkimdi de beıjaı qaldyrmaǵany anyq. Qalyń qazaqty Úkimet basshysy bolyp Baqyt­jan Saǵyntaevtyń kelýi qýantty­ degen oıdamyn. Mandatyn alǵan kezde Elbasynyń aldynda eshqandaı qysylmaı, qınalmaı qazaqsha erkin sóılep turǵan azamattyń Úkimet basshysy bolýy­ kóńilimizdi birledi. Al ózge aýys-túıister shahmat taqtasyn eske túsiredi. Fıgýralar aýystyrylady, biraq aınalyp kelgende kóp jaǵdaılar ózgerissiz qalady. Sol baıaǵy qosylǵyshtar ózgergenimen, qosyndy ózgermeıdi degen aksıomaǵa keledi.

- Júrsin aǵanyń «Din arqyly aqyndardyń basyn shyrmaý birazdan beri bastalǵan. Qajylyqqa jiberip, basqasha áser etip jatyr. Biz biraz aqyndarymyzdan aıyrylyp qal­dyq» degeni bar. Osy pikirdi sen qalaı jalǵar ediń?

- Iá, bir jyldary aqyndardyń bári qajylyq saparǵa bardy. Árıne, ol - quptarlyq is. Tek qana aqyn retin­de emes, musylman retinde qasıetti qaǵbaǵa baryp, táý etip, Paıǵambardyń izi qalǵan, keshegi bizdiń Qunanbaılar meshit salǵan, Shákárimder qajylyq jasaǵan jerlerdi kózben kórip, bes paryzdyń birin ótep qaıtty. Bul musylmannyń mańdaıyna jazylǵan baqyt dep sanaımyn. Biraq dinge berildim eken dep ónerdi tastap ketý quptarlyq is emes. Nartaı aqynnyń «Óleńim at ta boldy, ton da boldy, Yqtıar ne desem de qolda boldy. Aqynǵa bergen aram bolady dep, Shyǵar­dy sharıǵatta molda joldy» degen­ óleńi bar. Kezinde sol saýatsyz moldalar men aqyndar arasynda durys pátýa bolmaǵany tarıhtan belgili. Qazirgi dindi bilgender, bizdiń aqyn ata-babalarymyzdaı-aq bilsin. Batys­taǵy Abyl, Qashaǵandardyń dinı tolǵaýlary, Syrdaǵy súleı Turmaǵambettiń dastandary sharıǵattyń shartymen ushtasty. Sol arqyly halyqqa durys úgit-nasıhattar júrgizip otyrdy. Máselen, Qashaǵannyń Esqalı sopyny synap­, dombyrany haram degenine jaýap beretin tolǵaýy bar. Sondaǵy aqynnyń sonshalyq dinı saýattylyǵy tańdandyrady. Aqyndarymyz búgingi astyrtyn dinı sektalar men uıymdar qaptaǵan zamanda aýyzymen túzý sóılep, nasıhat jetip jatsa,­ bul bizdiń birden-bir jetistigimiz bolar edi.

- Aqyndardyń aıtyspen qoshtasýyna ne sebep? Toıyný ma, álde shabyttyń túgesilýi­ túrtki me?

- Árbirinde ártúrli sebep bar. Birinde otbasylyq jaǵdaı bolsa, birine qyzmet áser etip, ne jas degenine kóndirip jatady.­ Bul ózimniń basymda bol­maǵandyqtan bireý týraly syrtynan ton pishý qıyn bolar­. Biraq aqyn toıynǵannan ketedi degen­ tompaq keledi. Eger aqyn aıtystan asyp-tasyǵannan keter bolsa, ol ónerge degen opasyzdyq, qıanat bolar edi. Qazir aıtystyń kórermeni ózgergen. On jyl burynǵy aıtys atmosferasy da, tyńdarmany da bólek. Aqyn qansha azýly bolsa da, pýblıkaǵa ótpeı jatady. Saldarynan aıtyspen qoshtasyp jatatyn aqyndar bar. Shabyttyń túgesilýi de múmkin. Aqyn óziniń babyn joǵaltyp alsa, baǵyn joǵaltyp alsa, halyqtyń qabyldaı qoıýy, mahab­batyna bólenýi ekitalaı nárse. Sondyqtan baq pen babyń qatar shaýyp turǵan kezde sóz saıysta súrinbeýge tıistimiz. Ár aqynnyń dáýreni bolady. Biriniń dáýreni erte, biriniki kesh bitedi. Ǵumyrly bolýy úshin izdenisti toqtatpaýy tıis. Eger týma talan­tpyn dep, aıtysqa qatysa berseń, boıdaǵy óneriń de, óleńiń de sarqylady. Sondyqtan aqyndyqty árqashan shyǵar­mashylyq izdenispen ushtasty­ryp otyrǵan abzal. Eldiń bári júzge deıin jyrlaı beretin Jambyl emes. Dese de «Qaraǵaıǵa qarap tal ósedi» degen bar. Aldyńǵy býyn aǵa-ápkelerimizdiń sahnad­a uzaq júrgenin qalaımyn. Sol kisilerge qarap oı túzep, shyńdalamyz. Solarmen naǵyz saıysta ıyq tiresip júrsek, mártebe, ári mektep jal­ǵasar edi.

- Qarsylastar arasyndaǵy ázirlik qalaı júredi? Ótimdi ázil, utymdy usynys­, ýájdi sóz aıtylýy úshin óleń qurylymy aldyn ala daıyndala ma?

- Aıtysta qarsylas ár kezde ártúrli belgili bolady. Bir aı buryn, keıde bir kún qalǵanda ne sahnada bilip jatasyń. Qarsylasqa daıyndalýdyń eń birinshi joly - ony jete zertteý. Qaı óńirden shyqqany, qazir qaı jerdiń namysyn qorǵap júr? Buryndary kimmen aıtysqan, qandaı ýáj qoldanǵan? Kimnen jeńildi, kimdi utty? Sol aqyn shyǵyp jatqan óńirdiń saıası kemshilikteri, basshylarynyń qandaı qyzmet jasap­ jatqandyǵyn bilý qajet. Óz basym daıyndyqty osylaı bastaımyn. Utymdy ázil, ótkir sózder aqynnyń tapqyrlyǵy men oıynyń ushqyrlyǵyna baılanysty. Keıde sátti shyǵyp ketetin, keıde sátsiz jup bolyp kórinetin aıtystar bolady. Bul tek bir aqynynń babyna emes, qarsylastyń da shabysyna baılanysty. Barynsha myqty aqynmen aıtyssań, tartys odan saıyn qyza túsedi. Báıgedegi attardyń bári tuıaǵy jer tarpyp, shashasyna shań juqpaıtyn júı­rikter bolsa, alaman tartysty ótetini sekildi. Jasyratyny joq, aldyn ala josparlaý, sáıkestendirý degen de boldy. Bul aıtystyń derti edi. Qazir bári jónge keldi, menińshe. Al toıda qarsylaspen ázilderdi aldyn ala rettestirip alyp jatamyz. Bireýdiń qyzyqshylyǵynda bet tyrnasyp­, jaǵa jyrtysyp turmaısyń ǵoı. Al endi úlken báıgege, básekege túskende ózińniń mereıiń, ózińniń jeńisiń. Sondyqtan baryń­dy salasyń. Ne bolmasa birinshi aınalym­nan ótken soń ekinshi aınalymda attaryńdy atap, qarsylasyńdy sonda tanyta­ salady. Ondaı kezde aqyldasyp alý aqylǵa syımaıtyn dúnıe. Shappa-shapqa ketemiz. Mádenıettiligińniń deńgeıi men saýatt­ylyǵyńnyń shyn synalar tusy osy.

- Osy tusta maqam máselesine toqtalsaq. Eldiń delebesin qozdyratyn dom­by­ranyń shertisi men maqam. Maqamyń qalaı tańdaldy? Oınaqy áýender men túrli mıllızmderdi engizý kerek dep oıla­maısyń ba?

- Aqynnyń el esinde saqtalýyna bir­den-bir áser etetin – maqam. Meniń de izdeni­ste júrgen máselem osy. Óıtkeni keı aqyndar boldy sózi qansha keremet, arasyna­ qyl syımaıtyndaı bolǵanymen maqamy durys bolmaı, halyq qabyldamaı ketti. Al kerisinshe maqamynyń ádemiligimen daýysynyń halyqty baýrap alatyn qasıetimen eldiń esinde qalǵan aqyndar da bar. Máselen, Ázimbektiń maqamy áli kúnge jurt jadynda. Kezindegi Qonysbaı Ábilovtiń, Ásıa Berkenovanyń, Esenqul Jaqyp­bekovtiń, Shorabektiń árbiriniń ózindik maqamy boldy. Bergisi batystan daýyldatyp Mels Qosymbaev shyqqan kezde­ jelpinbegen qazaq joq shyǵar. Aqynnyń ózine tán maqamy bolýy negizgi kerek dúnıe. Qazirgi aqyndardyń kemshin túsip jatqan jeri de maqam máselesi. Bárimiz qoldanatyn bes-alty maqam bar. Jańa dúnıe týdyryp jatqandar az. Men de tórt jyldan beri Nartaıdyń maqamyna salyp aıtysyp júrmin. Bul meniń stılim desem de bolady. Syrda el aldyna alyp shyǵatyn qansha maqam bar. Biraq maǵan maqamdy salmaı uıatty bolǵannan, salyp uıatty bolǵan aýyr syndy kórinedi. Jyraýlardyń tókpe maqamdaryna salýǵa áli sheberligim jetispeıtin sekildi. Sol jaǵynan qysylyp júrmin. Biraq Syrdaǵy jyrshy, termeshilermen jolyqqan saıyn solardan úırený ústindemin. Aldaǵy ýaqytta maqam jaǵynan jańalyq jasaımyn degen nıettemin. Oınaq­y áýen, mıllızm kerek degenińiz durys árıne, biraq ony óleń qurylysyna qaraı qoldaný kerek. Sońǵy kezde estradadaǵy oınaqy áýenderdi aıtysta qoldaný «moda» bolyp ketti. Arasynda ózimiz de qoldanamyz. Dese de shekten shyqpaý kerek­ dep oılaımyn. Án aıtý halyqty kóteredi, qoshemetine bóleıdi dep beıbereket estradadaǵy dańǵaza­ǵa salý - aıtysty qorlaý. Keı qatarlastarymda osy nárse ádetke aınaldy. Aıtysyń ata sózge emes, ánge aınalsa, onyń ónerdegi ólsheýli ǵumyry qysqa. Sondyqtan aıtysty esirgen estradamen emes, esti sazben baıyt­qan durys.

- Aıtys júldesi aldyn ala sarapqa salynyp, satylady degen sybys bar. Ashyǵyn aıtsań.

- Sybys bar, shyndyq emes. Árkim alypqashpa áńgime aıtady. Sarapqa salynyp, satyl­ýy meniń óz kózimmen kórgen dúnıem emes. Al keıde qazylardyń qıanaty, batyrashtyń baltasy tıip, márege jaqyn qal­ǵanda shalyný kezdesedi. Ony óz basym­nan da ótkerdim. Árıne keıde jerge, rýǵa tartyp, báıgeni bóliserde kelispeýshilikter týyndaıdy. Bul aqynnyń kinási emes. Ol qazylardyń qateligi. Meniń birinshi aıtarym, aıtysta qazylardy «ádil qazylar» dep tanystyrady. Sol sózge men kelispeımin. Onyń ádildigi men ádilet­siz­digin halyq tarazylaıdy. Biraq qansha qıanat kórdik degenmen, oǵan moıymaı, jigerlene túsýimiz tıis. Qazydan opasyzdyq kórgen bireý bolsa, ol – Orazaly Dosbosynov. Ózi aıtqandaı «Kólik mingen aqyndar, Kókke ushyp ketken joq». Aqynnyń abyroı, bedeli­ berilgen kólikpen emes, halyqtyń kóńilimen ólshenedi. Oraz­ǵa, Ázimbekke, Shynbolatqa degen halyqtyń ystyq yqy­lasy men súıispenshiligi áli uzaq saqta­laryna senimdimin.

- Aqyndyqtyń, ataqtyń, tanymal­dyqtyń oń áseri kóp. Ol daýsyz. Alaıda bir dúnıege eńbeksiz qol jetkizgende ózgeniń jolyn kestim degen oı kelmeı me? Jalpy, ondaı dúnıe oryn aldy ma?

- Barǵan jerde el tanyp, elep jatqany árıne qýantady. Keıde ónerdi syılap, seni qurmettep jatsa, nesine qysylamyz. Aqyn bolyp elge tanylǵanymyzdyń ózi Alla bergen­ baq pen qalaýynyń, eńbektiń nátıjesi­. «Dúnıede eńbek qymbat, eńbek ulyq. Erinbeı umtylyńdar, erte turyp» dep Jambyl­ atamyz aıtqandaı, eńbeksiz keletin­ eshteńe joq. Al ońaı kelgen dúnıede­n aıyry­lýyń da ońaı. keı aıtysta 10 upaı bereti­n deńgeı­de aıtyspasań da qazylar oǵan deıingi eńbegińdi baǵalap, jetelep jiberedi. Sol kezderde táýir aıtysqan aqyndar tómen bal alsa, kelesi kezeńge ótpese, ózimdi qolaısyz sezinemin. Sońǵy Astanada bolǵan aıtys­ta Dıdar Qamıevpen kezdesýde biryńǵaı 10 upaı alatyndaı óner kórsetpedim. Biraq qazylar sheshimi solaı­ boldy­. Biraq mundaı sátterge joǵary­da aıt­qanymdaı, aqynnyń qatysy­ bolmaıdy. Ol qazylardyń uıǵarymy. Al stýdent kezimde aqyndyǵymdy elep, sabaqtarda joǵary bal qoıyp jiberetin. Munyń ózgege zalaly tıdi dep oılamaımyn. Sondyqtan sanaly túrde bireýdiń jolyn­ kesip, qıanat jasadym deı almaımy­n.

- Áleýmettik jelide A.Áshimovpen shahmat oınaǵan sáttegi sýretiń bar. Bul da seniń buqaraǵa beımálim bir qyryń. Jáne qandaı qasıetteriń bar?

- Iá, ol sýret byltyr túsirilgen. Júrsin aǵamyzben birge Asanáli Áshimov aǵamyzǵa sálem berip shyǵaıyq dep, jumysyna barǵan bolatynbyz. Ol kisimen shahmat oınaý ómirimdegi erekshe­ sátterdiń biri boldy. Asanáli aǵanyń shahmat oınaıtynyn buryn-sońdy bilmegen edim. Shahmat – meniń aıtysqa deıingi hobbıim. 5-synypqa deıin shahmat úıirmesine jazyldym. Shahmattyq jarystarda İ taqtada oınadym, İİİ dárejedegi shahmat sheberi degen ataǵym da bar. 5-synyptan bastap aıtysqa qyzyǵýshylyǵym artqannan keıin shahmatty tastap ketýge májbúr boldym. Biraq áli kúnge ara-tura oınap turamyn. Bul adamnyń logıkasyn damytýǵa eń qajetti sport. Odan bólek sýretti jaqsy salamyn. Sportqa bir búıregim buryp turady. Fýtbolǵa qyzyǵamyn. Qatyryp, japyr­yp dop teppesem de áýesqoılyǵym bar. «Barselonanyń» beldi jan­kúıerimin.

- Aǵa býyn keıingiler gazet-jýrnal, kitap oqymaıdy dep keııdi. Jaýyr­ bolǵ­an saýaldyń óńin ózgert­sek, jastar nege kitap oqýy kerek?

- Birde marqum Esenqul Jaqypbekov­ kórshisin kóshede kezdestirip qalady. Álgi kórshisi «qaıdan kele jatsyń?» dep surasa, «baspadan kitabymdy shyǵaryp kele jatyrmyn»,- deıdi. Sonda kórshisi: «siz aqynsyz ba?», -deıdi. «Iá, óleń shyǵaramyn»,- dese, kórshisi «bir jaqsy qasıe­tim kitap oqymaıdy ekenmin» degen eken. Kúletin jaıt. Alaıda aınalamyzda osyndaı «jaqsy» adamdardyń kóbeıip bara jatqandyǵy jaman úrdis. Basqany bylaı qoıǵanda, Eýrazıa ulttyq ýnıversıtetiniń qazaq tili men ádebıeti mamandyǵyn tórt jyl oqyǵan toptastarym 4 tomdyq «Abaı jolyn» oqymaǵan-dy. Olar Abaıdy oqymaǵan soń, ózgege aıtar sóz joq. Búginde oqyrman azaıǵandyqtan ba, tipti kezindegi keremet basylymdardyń ózi ınternet gazetke, portalǵa aınalyp ketti. Máselen, tushymdy, talǵamdy mater­ıaldar jarıalaıtyn «Alash aınasy» qazir «jerdegi juldyzdardyń» ishken-jegeninen ári asa almaıdy. Basylymdarǵa toqtalǵanda, astyn syzyp, aıshyqtap atap ótetin bir jaıt bar. Ony aıtpasam, ózimdi kináli sezinetin syndymyn. Tap osy «Halyq» gazeti – men úshin óte ystyq, erekshe basylym. Sebebi 2010 jyly respýblıkalyq aıty­sqa endi-endi qadam basqa­nymda alǵash ret «Halyq» gaze­tiniń 10 jyldyǵyna arnal­ǵan aqyndar aıtysynda azýly Bekar­ys Shoıbekov aǵamyzdy jeńip, bas júldeni ıemdengen edim. Sol arqyly aǵalardyń kózine túsip, kóptiń kózaıymyna aınaldym. Árkez aıtyp júremin, «Halyq» gazetiniń aıtys­ynan shyǵyp, halyqtyń balasy boldym» dep. Sol úshin sizderge alǵys aıtamyn. Ujymdaryńyzǵa shyǵarmashylyq tabys­ tileımin.

- Rıasyz áńgimeńe rahmet. Jaǵyń jańylmasyn!

Áńgimelesken

Jazıra ÁSHİRBEK

Derekkóz: halyk-gazeti.kz