«Aǵymdaǵy jylǵy 9 qyrkúıekte Úkimettiń keńeıtilgen otyrysynda Memleket Basshysy Úkimetke AÓK baǵdarlamasyn aǵymdaǵy «Agrobıznes – 2020» úkimettik baǵdarlamasy negizinde ázirleýdi tapsyrǵan edi. Elbasy atap ótkendeı, aýyl sharýashylyǵy salasy Qazaqstan ekonomıkasynyń draıverine aınalady», – dep atap ótti Asqar Myrzahmetov.
Aıta keteıik, Táýelsizdiktiń 25 jyldyǵyn elimiz rekordtyq deńgeıdegi astyqpen qarsy alyp otyr. Áleýmettik-ekonomıkalyq damý kórsetkishteri boıynsha 9 aıda aýyl sharýashylyǵy salasy óndiristik salany artqa tastap, aldyńǵy qatarǵa shyqty. Munyń barlyǵy da agrarılerdiń qajyrly qaıraty men eńbeginiń arqasy.
Kezdesý barysynda A.Myrzahmetov jańa baǵdarlamanyń maqsaty men mindetterin tarqatyp aıtty.
Óz kezeginde, Mınıstrlik aýyl sharýashylyǵy salasyn zerttep, zerdeleı kele, mal sharýashylyǵy men balyq, qus eti, shujyq, irimshik, súzbe, maı óndirisiniń tómen deńgeıde ekendigin jáne syrttan tasymaldanatynyn anyqtady (33%-ten 67%-ǵa deıin).
Munyń ózinde, qoı, sıyr eti jetkilikti dárejede óndiriletini jáne eksporttyq áleýetke ıe ekendigi anyqtaldy.
Ósimdik sharýashylyǵynda makaron, ósimdik maıy, kókenistik konserviler men qanttyń basym bóliginiń syrttan ımporttalatyny belgili.
«Taldaý barysynda biz Qazaqstannyń bıdaıdy artyǵymen óndiretinin, sondaı-aq, jem, arpa, qus etiniń jetispeıtinin de anyqtadyq. Et, sút, kókenisterdi qaıta óńdeý jáne sıyr men qoı eti eksportynyń tómen deńgeıde ekeni anyqtaldy», – dedi mınıstr.
Budan bólek, A.Myrzahmetov atalyp ótken máselelerdiń syrtqy saýdadaǵy aıyrmaǵa keri áser etkenin atap ótti (aýyl sharýashylyǵy ónimderi 2015 jyly – 2,1 mlrd. dollar, ımporty – 3,4 mlrd. dollar).
Memlekettik baǵdarlamanyń taǵy bir mindetiniń biri – aýyl turǵyndarynyń tabysyn arttyryp, naryqqa qajetti básekege qabiletti AÓK ónimderiniń óndirisin qamtamasyz etý.
Ázirlenip jatqan Memlekettik baǵdarlamanyń negizgi mindetteri: mal sharýashylyǵynyń tıimdiligin 58%-ǵa jáne ósimdik sharýashylyǵynyń tıimdiligin 40%-ǵa arttyrý, taýarly óndiriske 670 myń usaq óndirýshini tartý jáne ónimderdi ótkizý men óńdeýdiń pármendi júıesin qurý úshin aýqymdy aýyl sharýashylyǵy kooperasıalaryn damytý, ASHTÓ-ni barynsha qamtı otyryp, memlekettik qoldaýdyń tıimdiligin jáne qoljetimdiligin qamtamasyz etý, maqsatqa baǵyttalǵan eksporttyq saıasatty iske asyrý jáne organıkalyq ónimniń qazaqstandyq brendin jyljytý, 600 myń ga astam sýarmaly jerdi aınalymǵa tartý, AÓK-ni memlekettik retteýdi jetildirý bolady.
Sonymen qatar, baǵdarlamany memlekettik formatqa qaıta bekitý sheńberinde sýbsıdıalaý júıesine birqatar túzetýler engizý josparlanǵan, bul qazirgiden de kóp memlekettik qoldaý alýshylardy qamtýǵa, osylaısha onyń tıimdiligin joǵarylatýǵa múmkindik beredi.
Osy oraıda, astyqty óńirlerdiń ókilderi ósimdik sharýashylyǵyna qatysty AÓK-ti damytý sharalaryna basymyraq den qoıdy.
Bul rette, A.Myrzahmetov bıdaıdy qaıta óndirýdiń erekshelikterin eskere otyryp, aýyl sharýashylyǵy óndirýshilerin egis alqaptaryn dıversıfıkasıalaýdy jalǵastyra berýge shaqyrdy.
«Bıdaı alqaptary 2,3 mln. ga qysqarady. Bosatylǵan alqaptarǵa arpa, suly, júgeri jáne maıly daqyldary egiledi. Bizdiń tarapymyzdan egis alqaptary óńirler men daqyldar kesiminde esepteldi», – dedi ol.
Mal sharýashylyǵy salasynda mal azyǵymen qamtamasyz etý qajet. Osyǵan oraı, eldik azyqtyq teńgerim ázirlenip, engiziletin bolady, azyqtyq daqyldardyń alańdary ulǵaıtylady, qurama jemderdi óndirý jáne tutyný yntalandyrylady, sondaı-aq jaıylymdardy paıdalanýdyń tıimdiligin joǵarylatý boıynsha jumys júrgiziletin bolady. Sonymen qatar, memlekettik qoldaý kórsetý arqyly asyl tuqymdy janýarlardyń úlesin joǵarylatý boıynsha sharalar qabyldanatyn bolady.
Aýyl sharýashylyǵyn sýmen qamtamasyz etý jáne sýarmaly jerlerdiń alańdaryn ulǵaıtý boıynsha sharalardan basqa, qosymsha elektrondyq formatta jer resýrstarynyń jaı-kúıi týraly málimetter qalyptastyrylady.
Budan basqa, AÓK-ni ınfraqurymdylyq qamtamasyz etý úshin ónimdi ótkizý boıynsha aýyldyq kooperatıvter qurýdy yntalandyrý, aýyl turǵyndaryna nesıe berý jáne olarǵa servıstik qyzmet kórsetý, sondaı-aq qarjylyq quraldardyń qoljetimdiligin qamtamasyz etý boıynsha is-sharalar iske asyrylatyn bolady.
Búgingi tańda agroónerkásiptik keshendi damytýdyń 2017-2021 jyldarǵa arnalǵan memlekettik baǵdarlamasynyń tujyrymdamasy halyq talqysynan ótýde.
Eske sala keteıik, atalǵan baǵdarlama tujyrymdamasy elimizdiń batys óńirinde, «Atameken» ulttyq palatasy kesheninde Qoǵamdyq keńes pen Agrarlyq saıasat jónindegi keńes ókilderimen talqylandy.
QR ASHM Baspasóz qyzmeti
