Taıaýda ózgeshe bir jarnama kózime shalyndy. Onda: «Ata-anama kelin izdeımin. Ózime adal jar bolatyn qyzdar bolsa, habarlasyńyzdar!» dep jazylypty, telefon nómiri kórsetilipti. Habarlasyp, jarnama berýshiniń ózimen sóılestik.
Mundaı mátinde jarnama jazyp, taratýshy jigittiń esimi Asqar eken, ol óziniń famılıasyn ataǵandy qalamady. Degenmen Almaty jaqtaǵy Qaskeleń aýylynda turatynyn aıtty.
«Men buryn úılengen adammyn, – dedi Asqar. – Osydan 5 jyl buryn bir súıkimdi qyzben otbasyn qurǵanbyz. Alǵashynda túsinistikpen ómir súrdik. Áke-sheshem de: «Kelinimiz jaqsy, adal, aqkóńil eken», – dep únemi maqtaýyn asyryp otyratyn. Osyǵan men de qatty qýanatyn edim. Biraq bir ul týǵannan keıin kelinshegimniń minezi ózgere bastady. Ata-anamdy syılamaıtyn, olarǵa sóz qaıtaratyn boldy, tamaqty bergisi kelse beredi, bergisi kelmese bermeı-aq qoıa salady. Munyń durys bolmaıtynyn oǵan jaı aıtyp ta, qatty aıtyp ta túsindire almadym.
Bir kúni jumystan kelsem, úı ashyq-shashyq, jınalmaǵan, keshegi tamaqtan sońǵy ydystar jýylmaǵan, al ata-anam dalada otyr. Balam shyryldap besikte jylap jatyr. Kelinshegime birdeńe bolyp qaldy ma eken dep qorqyp kettim. Sodan alyp-ushyp bólmege kirsem, ol alańsyz uıyqtap jatyr eken. Boıymdy ashý kernegeni sonsha, oǵan qol jumsaı jazdadym. Túrtip oıatyp: «Munyń qalaı?» – desem, meni adam eken dep kózine iler emes. Menen bir aǵattyq ketipti degen sezim baıqalmady. Ashý-yzany irke almaı, biraz aýyr sózder aıttym da, syrtqa shyǵyp kettim. Kóńilim alaı-dúleı bolyp qatty qınaldym. Ózimdi ózim ázer bastym.
Birazdan soń bárimiz jıylyp, dastarhan basyna otyrdyq. Bul kezde men ózime, áke-shesheme aýyr tıetin bolsa da túbegeıli sheshim qabyldap qoıǵan edim. Ajyrasýdy uıǵardym. Osyny aıtqanymda kelinshegim selt etken joq, qaıta osyny kútkendeı maǵan ala kózimen bir qarady da: «Ajyrassaq, ajyrasaıyq», – dedi. Al ata-anam ún-túnsiz oryndarynan turyp, syrtqa shyǵyp ketti.
Áke-sheshem keıin bizdi tatýlastyrmaq bolyp ábden árekettendi, biraq ekeýmiz de ılikpedik. Aqyry sot arqyly ajyrasyp tyndyq. Jalpy, men burynǵy áıelimdi birjaqty kinálamaımyn. Kiná ózimnen de bar shyǵar, bilmedim. 5 jastaǵy ulym anasymen birge, olarǵa kómegimdi berip turamyn.
«Meniń jasym qazir 38-de. Otbasyn qurǵym keledi. Sol úshin ata-anama jaqsy kelin, ózime adal jar izdeýdemin. Internet arqyly izdegenimnen nátıje shyqpady. Sodan osylaı, maqsatymdy aıaldamalarǵa jarnama etip jazyp japsyryp qoıdym. Ótken 6 kún ishinde maǵan 100-den astam qyz-kelinshekter habarlasty. Kóbi oınap, mazaqtap habarlasady. Shyn nıetimen habarlasyp jatqandar da bar. Endi... munymnan ne shyǵaryn bolashaqta kóre jatarmyz. Eń bastysy, maǵan adal jar kerek. Turaqty jumysym, turatyn úıim bar, bir otbasyn baǵa alamyn. Bolashaq jarym tárbıeli jerdiń qyzy bolsa eken deımin. Adal jar jolyqsa, ómir boıy aıalap óter edim».
...Asqar osylaı deıdi. El ishinde ol sıaqty bas quraı almaı júrgen jandar joq emes qoı, áreketi nátıje berip, sondaı jandardyń biri jolyqsa, baǵyn ashar dep oılaımyz.
Derekkóz: zamana.kz
Avtor: Raýan Ómirjanqyzy
