NATO ókili keshendi túrde qarýlanǵan, az degende 1000 Reseı áskeri Ýkraına terıtorıasyna kirgeni jáne olardyń Ýkraına kúshterimen tikeleı kezikkeni týraly málimdedi. NATO taraptyń aıtýynsha, qazirdiń ózinde Ýkraına shekerasynda 20,000-nan artyq Reseı áskerı kúshteri júr. Al, Kıev búgin 100 tankti, keshendi qarýlanǵan áskerı kólikterdi jáne zymyran keshenderin qamtyǵan Reseıdiń qarýly kerýeni Ýkraına terıtorıasyna basyp kirgenin jarıalady. Ýkraına prezıdenti osyǵan baılanysty Túrkıaǵa saparyn da kúshinen qaldyrǵany málim. Osyndan keıin, BUU qaýipsizdik keńesi de RF-nyń Ýkraınaǵa ásker kirgizýine baılanysty shuǵyl otyrys ótkizgen. Bul týraly Brıtan elshisi Mark Lıoll Grant: « Reseı ne úshin qarýly kúshterin Ýkraına terıtorıasyna kirgizgenin túsindiretin bolady. Qazir Reseı áskerleriniń Ýkraına terıtorıasynda júrgeni anyqtalyp otyr»,-deıdi. «Reseı Ýkraına terıtorıasyna jibregen SA-22 sıaqty eń jańa áýe qorǵanys júıeleri jáne últra-zamanaýı jabdyqtary qazirgi urysta ashyq qoldanylyp jatyr»,-degen AQSH jaǵy Reseıdiń osy jolǵy kópe-kórneý shapqynshylyǵyna shara qoldaný kerek ekendigin málimdedi.

Al, Ýkraına tarapy osy shuǵyl jaǵdaı týraly Eýroodaq elderinen «zor kólemdi» áskerı qoldaý surap otyr. Eýroodaq Ýkraına topyraǵynda Reseı kúshteriniń júrýi týraly « qatty alańdaýly»  ekenin málimdedi. Brıtanıa premer-mınıstri Devıd Kemeron Reseı tankileriniń Ýkraına shekarasynan basa kóktep kirýi « múldem qabyldaýǵa kelmeıtin jáne zańsyz» shapqynshylyq dep aıyptady.  Brıtan premeri Ýladımır Pýtın qarýly kúshterin shegindirip áketpese, «saldarynyń» qıyn bolatynyn aıtýda. Ýkraına jaǵdaıyna qatysty qatty alańdaýshylyǵyn bildirgen ol bul zańsyz áreketti jedel toqtatý kerektigin aıtady. Keler aptada Ýelsta ótetin NATO-nyń samıtynda óziniń odaqtastarymen osy másele tóńireginde sheshim qabyldaıtynyn málimdegen. «Reseıdiń ońtústik-shyǵys Ýkraınaǵa zor kólemde basyp kirgeni týraly aıǵaqtamalar men dáleldemeler meni qatty alańdatyp otyr. Bul kórshilik pen egenmendikke qater tóndirgendik»,-deıdi ol.