Qostanaı oblysyndaǵy túzetý mekemeleriniń ishinde Jitiqaradaǵy ÝK-161/3 orny aıryqsha. Halyqqa «Qara búrkit» dep tanylyp ketken bul mekemede jazanyń eń aýyr túrleri qoldanylady. Buryndary bul lagerde naǵyz búrkitti ustaǵan kórinedi. Biraq aýyr atmosfermaǵa shydaı almaǵan qus ataýly ushyp ketken. Lagerde qaıtys bolǵan qylmyskerler qupıa jerlenetin bul meken qarańǵy túnekpen teń.
«Qara búrkit» lagerinde Vladıslav Chelah, Rústem Ibragımov jáne almatylyq atqysh Kúlekbaev jazalaryn óteýde. Budan buryn lager qabyrǵasynda kisi etin jeıtin Sergeı Kopaı da jazasyn ótegen eken, dep jazady «Qamshy» portaly.
Ómirlik jazaǵa tartylǵandardyń túrmedegi ómiri qandaı, olardyń otbasy músheleriniń sezimi jaıynda Karavan gazetiniń tilshileri qylymskerlerdiń tanystary men jaqyndarynan bilip qaıtty.
Chelah óz mahabbatymen qaıta qaýyshýdy ańsaıdy
Chelahtyń otbasy búgingi tańda Kalınıngradta ómir súredi, atasy Qazaqstanda qalǵan.
Jaqyndarynyń aıtýynsha, Chelah 2012 jyl «Arqankergen» áskerı aımaǵynda bolǵan jaǵdaıdy áli kúnge deıin qupıa ustaıtyn kórinedi. 14 áskerdiń janyn qıdy degen aıyppen Chelah ómir boıy bas bostandyǵynan aıyrylǵan. Qaıtys bolǵan áskerlerdiń otbasyna 5 mıllıon teńge kóleminde aıyppul tóleýi tıis edi, biraq jigit tóleýden bas tartyp otyr. Ulynan apta saıyn hat alyp turatyn Svetlana apaı aqyry bolǵan jaǵdaıdy bile almady. Biraq, ana júregi balasynyń kinásiz ekenine senimdi. Hatynda Chelah ózin ýaıymdamaýyn jáne mindetti túrde bosap shyǵatynyn jazady.
Vladıslav alǵashynda kamerada jalǵyz bolǵan, keıinirek ony basqa tutqyndardyń janyna «Qara búrkit» lagerine aýystyrǵan. Sol sátte-aq Vladıslav hat jazýdy bastaǵan.
«Meniń jaǵdaıym jaqsy, densaýlyǵym táýir. Tirimin. Tek jalyqtym, eshteńemen aınalysqym kelmeıdi. Bir núktege qarap otyryp qalatyn kezderim kóp bolady. Jańa jyldy da toılamadym. Saǵat túngi 10-da uıyqtap, tańǵy 6-da oıandym. Bala kezimde qýanyp toılaıtyn meıramnyń bul joly jaı kúndegiden aıyrmashylyǵy bolmady.
Osy jaqynda ǵana ıogamen aınalysýdy bastadym. Denemdi sozý, tynys múshemdi qalyptastyrý syndy jattyǵýlardy jasap turamyn. Aǵzamdy, juıkemdi retke keltirýim kerek qoı. Qur otyra bergennen eshteńe ózgermeıdi. Jas qalpymdy saqtap qalýym kerek.
Saǵan da ıogamen aınalysýǵa keńes beremin, anashym. Ol densaýlyqqa paıdaly.
Sizdermen jıi kezdesip turý úshin tártip buzbaýǵa tyrysyp júrmin».
Jańa lagerge aýysqaly ulymen kezdesýi qıyndap ketken eken, jylyna tórt ret qana kórisýge ruqsat beredi.
Áskerge barar aldynda anasy Chelahtyń súıikti qyzy bolǵanyn da aıtyp qaldy. Alaıda, qyz jigitti kútkisi kelmeı, turmysqa shyǵyp ketti. Vladıslav bolsa, mahabbatyn áli de ańsaıdy, saǵynady, kezdesetin kúnderin kútedi.
Óz qaryndasyna jazǵan hatynda Vlad súıiktisi Ianany tipti balaly kúımen qabyldaýǵa daıyn ekenin aıtty.
Ana balasynyń aqtalyp, bir kúni bosap shyǵatynyna senimdi.
Túrme ishinde kisenmen júretin qylmysker
Belgili saıasatker Altynbek Sársenbaev pen onyń eki kómekshisin óltirip, ómir boıyna bas bostandyǵynan aıyrylǵan Rústem Ibragımov ta Chelahpen bir lagerde jazalaryn ótep júr. Alaıda, bir-birimen áli de jolyqpaǵan. Qylmyskerler taza aýamen tynystaý úshin jarty saǵat ýaqytyn serýendeýmen ótkizedi, sol kezdiń ózinde eki sottalýshy kezdespegen.
Serýendeý barysynda Rústemge kisen taǵyp, aınalasyndaǵy adamdardy kórmesin degen maqsatpen bir kózin jaýyp turatyn qara baskıim kıgizedi, basqa qylmyskerlermen sóılesýge qatań tyıym salady. Tipti, serýendeý kezinde de.
Kisi etin jeıtin qylmyskerdiń ólimi
Osy ýaqytqa deıin «Qara búrkit» lagerinde belgili adam jegish Sergeı Kopaı jazasyn ótep júrdi. Ol aldymen almatylyq jezókshelerdi óltirip, sodan soń etin jep kún keshken. Sotta 7 áıeldiń ómirin qıyp, etinen farsh jasap, pelmen túıgen vıdeo-jazbalary kórsetilgen. Almaty qalalyq soty «adam jegishterdi» ólim jazasyna kesý jaıynda úkim shyǵardy.
Tergeýshi Vladıslav Bekshaevtiń aıtýynsha, ony qylmyskerlerdiń ózi-aq óltirmekshi bolǵan. Alaıda, araqqa qunyqqan Kopaı aýyr naýqastan kóz jumady. Denesi qupıa mekenge jerlengen, máıitinde ólgen kúni jazylǵan taqta ǵana bolady.
