Belgili aıtysker aqyn Balǵynbek Imashev áıelin qatty qyzǵanatynyn, sondaı-aq, tipti, tórkinine de óziniń ruqsatynsyz jibermeıtin kórinedi.

Bul týraly «Áıel baqyty» baǵdarlamasynda aıtyldy, dep jazady stan.kz.

Qyzǵanshaqtyqtyń adam densaýlyǵyna keri áserin tıgizetinin aǵylshyn ǵalymdary dáleldep otyr. Máselen, shekten tys qyzǵanshaq jandarda bas aýrýy, asqazan aýrýy jáne de uıqysyzdyq jıi mazalaıdy eken. Al nemis ǵalymdary jer betindegi halyqtyń 95℅-ynda qyzǵanysh seziminiń bar ekenin aıtyp otyr. Osy oraıda, aıtysker aqyn Balǵynbek Imashev ózin osy kóptiń qataryna jatqyzatynyn aıtyp ótti.

«Sóz joq, qyzǵanshaqpyn. Óte qyzǵanshaqpyn. Biraq týǵan-týysqandaryna jiberip turamyn. Jubaıym syrtqa kóp shyǵa bermeıdi. Ózi 10 balanyń arasynda ósken, anasynyń da bergen tárbıesi óte jaqsy. Tórkinine jibersem, «Ákem-sheshem maǵan kúıeýińsiz kelme dep aıtqan» dep jalǵyz barmaıdy. Sol sebepti ekeýimiz birge baramyz», – deıdi Balǵynbek Imashev.

Al psıholog Venera Teljan óz kezeginde qyzǵanyshqa boı aldyrmaýǵa keńes berdi. Munymen qatar, áıelderdiń erlerge qalaı durys qyzmet qylý kerektigi týraly aıtyp ótti.

«Qazirgi turmys quryp jatqan jastarda sabyr joq. Bir-birin túsinisýge tyryspaıdy. Óıtkeni adam sabyrly bolýy úshin onyń denesi, sana-sezimi, tulǵasynyń barlyǵy durys bolýy tıis. Adam kúndelikti ómirde psıho-emosıonaldyq qıyndyqtar kóredi. Ony artynsha otbasyna alyp keledi. Otyryp alyp osynyń barlyǵyn kúıeýine jiberedi. Áıelderge «Sizder kúıeýlerińizge qyzmet jasańyzdar, syılańyzdar» dep aıtyp otyramyn. Olar óz kezeginde joldastarynyń erkelep, qutyryp ketkenin aıtady. Osy tusta qyzmet qylý men ózińdi tómendetýdiń arasyn durys ajyratyp alý kerek. Onyń barlyǵy aınalyp kelip qaıtadan óziniń emosıasyna áser etedi. Qaıtadan qyzǵana bastaıdy», – deıdi maman.