Ulystyń uly kúni naýryz merekesine oraı ulttyq ónerimizdi ulyqtap, dástúrli jyr, terme, tolǵaýlarymyzdy dáripteý maqsatynda "Alataý" dástúrli óner teatrynda "Máńgilik el" jyr-terme keshi ótti.
Altaı-Atyraý, Arqa-Alataý baýyrynan kelip, Almaty baýraıynda bas qosqan dástúrli ónerdiń kil myqtylary 21-22 naýryz kúnderi alyp shahar Almatynyń turǵyndary men qonaqtaryna arnap óner kórsetti.
21 naýryz "Tulpar minip, tý alǵan" atty ult-azattyq jyr-tolǵaýlar keshin belgili jyrshy, ónertanýshy ǵalym, fólklorshy, Memlekettik "Daryn" syılyǵynyń ıegeri Berik Júsip júrgizse, 22 naýryz "Atymdy adam qoıǵan soń..." atty adamgershilik pen izgilikti jyrlaıtyn keshtiń tizginin Erbolat Shaldybek ustady.
Elimizdiń túkpir-túkpirinen kelgen jyr tulparlarynyń oryndaýyndaǵy HV ǵasyrdan bastaý alǵan Handyq dáýir ádebıetiniń kórnekti ókilderi Aqtamberdi, Buqar jyraý, Ábýbákir Kerderiniń tolǵaýlary men Mahambet Ótemisuly, Jambyl Jabaevtyń jyrlary kórermender kóńilinen shyqty. Sonymen qatar keshke qatysýshy jyr-termeshiler óz oryndaýlaryndaǵy týyndylardy usyndy.
Ónermen aýyzdanyp, jyrmen jubanǵan, ataly sózge toqtalyp, bataly sózge bas ıgen xalqymyz ulttyq ónerdi joǵary baǵalaıdy. Búginde kórermenniń estetıkalyq talǵam, tarazysy bıik, talaby zor. Soǵan qaraı oryndaýshylar da sheberligin shyńdap, synǵa des bermeıdi. Ony «Máńgilik el» jyr-terme keshine qatysýshylardyń ónerlerinen baıqaýǵa bolady. Shetinen «sen tur, men ataıyn» deıtindeı qaıtalanbaı daryn ıeleri. Óz kezeginde kózqaraqty kórermen de jyr-terme oryndaýshylarynyń ańysyn ańdap, qabiletterin baǵamdap otyrǵandaı boldy.
Almaty qalasy Mádenıet basqarmasynyń uıymdastyrýymen «Alataý» dástúrli óner teatrynda ótken kesh ulttyq ónerimizdiń ósip-órkendeýine qosar úlesi zor dep esepteımiz.
