Qarqaraly aýdanyndaǵy Aǵadyr aýylyn, Shet aýdanyn,  Nurken jáne Aqshoqy aýyldaryn qar sýy basty, - dep habarlaıdy «Qamshy» portaly  tengrinews.kz-ke silteme berip. Vıdeodan sý deńgeıiniń qatty kóterilmegenin kórýge bolady. Alaıda aýylda arnaıy rezeńke etiktersiz júrý múmkin emes. Sondaı-aq, tótenshe jaǵdaıdyń saldarynan kólik qozǵalysy qıyndaǵan.

Qarqaraly aýdanyn da qar sýy basyp jatyr. Aqshoqy men Nurken aýyldary sý astynda qalǵan, sharýashylyq qurylystaryn da sý basqan. Nurken aýyly turǵyndarynyń aıtýynsha, sý keıbir jerlerde úıdiń ishine deıin kirip jatyr.
"30 naýryzda eldi mekenderdi sý basty. Byltyrǵydan qaraǵanda eki ese kóp sý boldy. Dalada júrgen jylqylarymyz sýdyń ortasynda qaldy", - deıdi aýyl turǵyndary. Qutqarýshylar da aýlalardy sý basqanyn jasyryp otyrǵan joq. Tótenshe jaǵdaılar qyzmetindegiler turǵyndardan sabyr saqtaýlaryn suraıdy.
"Oblysta eki kún qatarynan jańbyr jaýdy. Onymen qosa qar erip jatyr. Árıne, sý ózdiginen eshqaıda ketpeıdi. Aǵadyr aýylynda tańerteń sýdyń deńgeıi 10 santımetrge deıin jetti, qazir basyldy. Oblysta 54 baqylaý pýnkti jumys istep jatyr. Jaǵdaıdy baqylap otyrmyz. 100 paıyzǵa daıynbyz", - dedi oblystyq TJD baspasóz qyzmetindegiler. Sondaı-aq, vedomstvodaǵylar zardap shekkenderdiń joq ekenin aıtyp ótti.