Qytaı Halyq Respýblıkasyna jasaǵan jumys saparynyń ekinshi kúni QR Premer-mınıstriniń orynbasary – Aýyl sharýashylyǵy mınıstri Asqar Myrzahmetov bastaǵan qazaqstandyq delegasıa QHR Komersıa mınıstri Chjýn Shanmen kezdesti dep habarlaıdy qamshy.kz QR ASHM Baspasóz qyzmetine silteme jasap.

Onda ınvestısıalyq yntymaqtastyq pen qazaqstandyq bıdaıdy jetkizý kvotasyn arttyrý máseleleri qaraldy.

Sondaı-aq, Qazaqstan Respýblıkasyndaǵy aýyl sharýashylyǵy ónimderin qaıta óńdeý jobalaryn ınvestısıalaý jáne qazaqstandyq azyq-túlikti QHR-ǵa eksporttaý boıynsha QHR Halyqaralyq saýda-sattyqqa atsalysý komıteti ókilderimen kelissózder júrgizildi.

Aıta keteıik, A.Myrzahmetov bastaǵan delegasıa quramynda Aýyl sharýashylyǵy mınıstrligi ókilderi, oblys ákimderiniń orynbasarlary, óńirlerdiń salalyq basqarmalarynyń, «QazAgro» holdıńi men enshiles uıymdarynyń basshylary, Ulttyq agrarlyq ǵylymı-bilim berý ortalyǵy qyzmetkerleri jáne aýyl sharýashylyǵy qaýymdastyqtarynyń jetekshileri men jeke kásipkerler bar.

Sapardyń basty maqsaty – Memleket basshysy N.Nazarbaevtyń «Qazaqstannyń úshinshi jańǵyrýy: jahandyq básekege qabilettilik» atty Qazaqstan halqyna Joldaýyndaǵy AÓK-ke shetelden ınvestısıa tartý men aýyl sharýashylyǵy ónimderiniń eksporty boıynsha bergen tapsyrmalaryn júzege asyrý jáne eki jaqty tıimdi kelisimderge qol jetkizý.

Buǵan deıin delegasıa músheleri QHR Sapany qadaǵalaý, ınspeksıa jáne karantın jónindegi bas basqarmasy men QHR Aýyl sharýashylyǵy mınıstrligi jáne QHR-dyń bıznes qaýymdastyǵy ókilderimen kezdesip, eki eldiń aýyl sharýashylyǵy salasyndaǵy yntymaqtastyǵyn arttyrýdyń jańa joldary talqylandy jáne kún tártibinde turǵan birqatar máseleler sheshimin tapty.