Dúnıe alma-kezek dep beker aıtylmaǵan eken. Seniń basyńa qonǵan baq, erteń basqanyń basyna qonbasyna kim kepil?! Ózgeniń ómirindegi qaıyrshylyq kezeńdi sen de bastan keshirýiń múmkin. Sondyqtan kez-kelgen ýaqytta kómekke muqtaj jandarǵa qolǵabys etip júrý kerek eken. Ómirlik máni bar, sabaq bolarlyq oqıǵany Qamshy aqparattyq agenttigi mazhab.kz-ke silteme jasaı otyryp oqyrman nazaryna usynady.
Minezi jaıdary qyz bir jigitke turmysqa shyǵady. Úılený toılaryn ótkizip, úılerine qaıtady. Úıde qalyńdyǵy kúıeýine keshki as ázirleıdi. Otyryp, mine jeımiz dep turǵanda, bireý tynymsyz esikti qaǵa bastaıdy. Ekeýi de qatty tańdanady. Kúıeý jigit:
«Toı kúni dál myna ýaqytta kelip, mazany alý baryp turǵan ádepsizdik qoı», dep ishinen oılaıdy.
Esiktiń qasyna baryp, ol:
«Bul kim?» dep suraıdy. Esiktiń syrtynan bireý:
«Men bir bıshara qaýsaǵan shalmyn. Qarnym óte ash. Azdap tamaq surap kelip turmyn», -dep jaýap qaıyrady. Jigit yzalanyp, esikti ashady da, álgi adamdy ursyp, uryp qýyp jiberedi. Jigittiń qatygezdigi men qatty soqqysynan jaraqaty qatty syzdaǵan baıǵus shal ash kúıi burylyp ketedi.
Jigit esikti qulyptap, jarynyń aldyna oralady. Biraq, kútpegen jerden bir ǵajap jaǵdaı oryn alady. Jigit kenetten jyn soqqandaı aıǵaılap shyǵa keledi de, ár jerde bir otyryp jylaı bastaıdy. Jańadan turmys qurǵan kelinshegine qaramaı qoıady. Áıeli de bul jaǵdaıdan qatty qorqady. Al jigit bolsa úıden shyǵyp, tentirep ketedi.
Sóıtip jas kelin tórkinine qaıtyp oralady. Kúıeýine ne bolǵanyn, onyń qaıda júrgenin eshkim bilmeıdi. Ol iz-tússiz joǵalyp ketedi. Sol boıy qaıtyp kelmeıdi.
Aradan 14 jyl ýaqyt ótedi. Bir kisi tul áıelge quda túsip keledi. Qyz da, onyń áke-sheshesi de nekege kelisim beredi. Toı ótip, erli-zaıyptylar óz úılerine barady. Zaıyby kúıeýine as ázirleı bastaıdy. Sol kezde esikti bireý taqyldatady. Kúıeýi esikti ashýǵa baryp, esiktiń aldynda tamaq surap kelgen bir bıshara kisini kóredi. Úıinen bar tamaqty shyǵaryp, áıeline:
«Mynany álgi kedeı adamǵa ber, toıǵansha jesin. Odan qalǵanyn biz jeımiz»,-deıdi.
Áıeli kúıeýiniń aıtqany boıynsha bar asty berip, kedeıdi razy qylyp shyǵaryp salady da kúıeýiniń aldyna kózderi jasqa tolyp oralady. Kúıeýi tańǵalyp, onyń nege renjigenin suraıdy. Jubaıy da basynda eshteme aıtpaıdy. Kúıeýi qaıtalap suraı bergennen soń, áıeli bylaı áńgimelep beredi: «Esigimizdi qaǵyp, tamaq surap kelgen adam – ol 14 jyl buryn meniń kúıeýim bolǵan. Toıymyz ótip, keshkilikte birge tamaq jeımiz dep otyrǵan kezde, bir kedeı esigimizdi qaǵyp keledi. Sonda kúıeýim yzalanyp, álgi kedeıdi uryp, qorlap, qýyp jibergen bolatyn. Artynan, ózi de aýyryp, úıden shyǵyp habarsyz ketken edi».
Oqıǵany estip, eri kúıinip jylaıdy. Áıeli oǵan: «Nege jylaısyń?» dep suraıdy. Ol: «Seniń kúıeýiń uryp soqqan ol adam men edim»,- dep jaýap beripti.
Musylman baýyrym, musylman qaryndasym!
Adamǵa adam jat emes, adam bir-birine qonaq. Endeshe, paqyr men kedeı jandarǵa sarańdyq etpeńder! Kúnderdiń birinde sender de solardyń haline túsip qalýlaryń ábden múmkin.
Arabshadan aýdarǵan:Hasan Amanqulov
Sholýshy: Ásel Óteshova
