26 maýsymda Elızaveta İİ patshaıymnyń inisi, álemdegi alǵashqy EKSPO kórmesiniń negizin qalaýshy hanzada Alberttiń urpaǵy, Joǵary Mártebeli Gloster gersogi, hanzada Rıchard EKSPO-2017 kórmesindegi Ulybrıtanıa Ulttyq kúnin saltanatty túrde ashqan edi.
Búgin Qazaqstan Respýblıkasy Investısıalar jáne damý mınıstri Jeńis Qasymbek Ulybrıtanıa Birikken Koróldigi men Soltústik Irlandıanyń Saýda jáne ınvestısıalar mınıstri Greg Hendspen kezdesti, dep jazady Qamshy.kz aqparat agenttigi QR IDM baspasóz qyzmetine silteme jasap.
Kezdesý barysynda alda ótetin saýda-ekonomıkalyq, ǵylymı-tehnıkalyq, mádenı yntymaqtastyq jónindegi Qazaqstan-brıtan úkimetaralyq komısıasynyń 4 otyrysy týraly, sondaı-aq Qazaqstan men Ulybrıtanıa arasyndaǵy ınvestısıa, taý-ken, aýyl sharýalyshyǵy sıaqty perspektıvaly baǵyttar boıynsha seriktestik ornatý jaıyn talqylady.
«Men eki el arasyndaǵy qarym-qatynastyń jyl saıyn nyǵaıyp kele jatqandyǵyn erekshe atap ótkim keledi. Ulybrıtanıa – bizdiń Eýropadaǵy eń iri strategıalyq seriktesterimizdiń biri», dedi Jeńis Qasymbek.
Condaı-aq, kezdesý barysynda Qytaı-Qazaqstan-Ulybrıtanıa arasyn baılanystyratyn «Uly Jibek joly» ekonomıkalyq beldeýin júzege asyrýda birlesip jumys atqarý úshin úshjaqty kelisim ornatý máselesi de sóz boldy.
Búginde Qazaqstan terıtorıasy arqyly Qytaı men Eýropanyń arasynda 15 tranzıttik konteınerlik poıyz júredi. Ótken jyly «Qytaı-Eýropa-Qytaı» baǵytyndaǵy tranzıttik konteınerler tasymaly 104,5 myńǵa jetip, 2015 jylmen salystyrǵanda eki esege artyp otyr (49,9 myń konteıner).
2017 jyly Chjeszán (QHR) – London (Ulybrıtanıa) baǵyty boıynsha alǵashqy júk konteınerlik poıyzy iske qosyldy. Endigi rette bul baǵyt boıynsha júkti týra 18 kún ishinde jetkizetin múmkindik týdy. Bul júk kemesine qaraǵanda qyzmetin 30 kún erte oryndaıdy.
Búginde úkimetaralyq komısıa aıasynda bilim jáne ǵylym, energetıka, taý-ken ónerkásibi baǵyttary boıynsha 4 jumys toby jumys isteıdi.
Ulybrıtanıa - taýar aınalymy boıynsha Qazaqstannyń eń iri 10 seriktesiniń qataryna kiredi, sondaı-aq, Qazaqstanǵa eń kóp ınvestısıa ákeletin úzdik alty eldiń qatarynda. Ulybrıtanıa sońǵy 12 jyl ishinde Qazaqstanǵa jalpy kólemi 12,1 mlrd. AQSH dollaryn quraıtyn tikeleı ınvestısıa ákeldi (2005 jyldan 2017 jyldyń birinshi toqsanyna deıingi kórsetkish boıynsha tikeleı ınvestısıa kólemi 12 278,2 mln. AQSH dollaryn quraıdy). Bul - Qazaqstanǵa tartylǵan jalpy sheteldik ınvestısıanyń 5%-y.
Anyqtama úshin: 2017 jyldyń qańtar-sáýir aılary boıynsha Qazaqstan men Ulybrıtanıa arasyndaǵy taýar aınalymy 422,6 mln. AQSH dollaryn qurady. Bul 2016 jyldyń dál osy kezeńimen salystyrǵanda 26,6%-ǵa joǵary (333,7 mln. AQSH dollary).
