Esepti merzim aralyǵynda oblys aýdandarynda jerge quqyqtardy tabystaý maqsatynda 4 aýksıon ótkizildi dep habarlaıdy Qamshy.kz aqparat agenttigi. Bul týraly Óńirlik komýnıkasıalar qyzmetinde ótken brıfıńte  Jambyl oblysy ákimdiginiń jer qatynastary basqarmasynyń basshysy Beıbitbek Jaılybaev aıtty.

B.Jaılybaevtyń sózine sensek, aýksıondar arqyly satylymǵa aýmaǵy 12,6 gektar jer ýchaskeleri shyǵarylyp, olar 51 mln. teńgege baǵalanyp satyldy.

Bul ótken jyldyń tıisti kezeńimen salystyrǵanda 38 mln. teńgege artyp otyr.

Sondaı – aq, «Nurly jer» memlekettik baǵdarlamanyń bir baǵyty jeke turǵyn úı sektoryn damytý bolyp tabylady. Bul oraıda qurylys úshin bólingen aımaqtarǵa memleket esebinen ınjenerlik ınfraqurylym jelilerin tartý kózdelgen.

Ony júzege asyrý úshin qurylysqa  belgilengen aýmaqtardaǵy jerler memleket muqtajy úshin alynýy tıis. Bul sharany der kezinde júzege asyrý úshin birinshi kezekte oblystyń eldi mekenderiniń shekaralary Bas josparlarǵa sáıkes qaıta zańdastyrylyp bekitilýi kerek.

2005 jyldan bastap  jer ýchaskesiniń kezeginde turǵandar sany 101054 adam o.i. (Taraz qalasynda 66372, Baızaqta 4146, Jambylda 5655,  Qordaıda 12542, Merkide 3602, T.Rysqulovta 2659, Shýda 4603).

Oblys kóleminde bıylǵy jyly 249 ga. jer daıyndalyp, 2247 ýchaske sany berilýge daıyndalýda.

Jer qatynastaryn retteýdi jetildirý maqsatynda atqarylǵan mańyzdy sharalar:

- jer naryǵyn qalyptastyrýdy jetildirý maqsatynda  oblys aýmaǵynda eldi mekender shegindegi jerlerdi jeke menshikke berý kezinde tólenýi tıis tólemaqynyń bazalyq stavkalaryn naqtylap belgileý jumystary atqaryldy.

-saýda-sattyqtardy ótkizý barysynda bazalyq stavkalarǵa túzetý koeffısentterin qoldaný úshin eldi mekender aýmaǵyn baǵalaý aımaqtaryna bólý jumystary júrgizildi. 

- aýyl sharýashylyǵy maqsatyndaǵy jerlerdiń tolyqqandy ıgerilýin qamtamasyz etý maqsatynda jer salyǵynyń mólsherin on eseden asyrmaı joǵarlatý týraly ókiletti organnyń sheshimderi qabyldanyp, Ádilet departamentinde memlekettik tirkeýden ótti.

- sol sıaqty, 2015 - 2016 jyldary oblystyq búdjetten bólinetin qarjy esebinen aýyl sharýashylyǵy maqsatyndaǵy bosalqy jerlerge túgendeý jumystary júrgizildi.

Nátıjesinde taýarly aýyl sharýashylyǵy óndirisin júrgizý úshin aınalymǵa tartýǵa jatatyn 30 myń gektar egistik jerler bar ekendigi anyqtaldy.

Endigi kezekte anyqtalǵan bosalqy jerler quramyndaǵy aýyl sharýashylyǵy óndirisin júrgizýge qolaıly jerler agrarlyq salaǵa ınvestısıalar salatyn ınvestorlarǵa berý kózdelýde, - dep ÓKQ ótken brıfıńte málimdedi Beıbitbek Shyndalyuly.