Boıdaq kúnderdegi mahabbat qashan da bal-shyryn. Sol kúnderde ǵumyr boıy súıý, máńgilik mahabbat degenderge ár ǵashyq aınymastaı senedi. Alaıda úılengen soń turmys kúıbeńi aralasqan sezimniń baǵdary basqa arnaǵa aýysyp keterin turmys qurǵandar ǵana jaqsy bilse kerek. Onyń jaıyn jastar, tipti, sezine de almas. Alaıda mahabbatty máńgilik alaqanda aıalap ustaı alý – erli-zaıyptylardyń ekeýiniń de boryshy, mindeti. Bul jaıǵa nemquraıly qaraý qasiretke aparyp soǵady. Myna bir ajyrasý aldyndaǵy azamattyń haty jastarǵa, endi ǵana shańyraq kótergen jas jubaılarǵa oı salady degen úmittemiz.
***
Úılengenge deıin meniń kóńilimnen tereń oryn aldyń. Únemi meni shyǵyndatýǵa áýes ediń. Birese ony alamyn, birese muny alamyn dep qıǵylyq salsań da, bárine maqul der edim. Alaıda úılengen soń, bári basqa arnaǵa aýysty. Qıalyńda aqsha jınaýdan basqa oı joq. Jalaqymdy túgeldeı tapsyrýdy talap ettiń. Áıel zatynyń ár qarajatty kúıeýimen aqyldasyp, múmkin bolsa otbasyn er azamat basqarýy tıis ekenin bilmeıtin be ediń?!
***
Úılenýden buryn, qashanda aldymnan sulý bolyp shyǵatynsyń. Al úılengen soń she?! Otbasynda óz-ózine onsha kóńil aýdarmaıtyn, quddy bir salaq áıelder sekildi keıipke endiń. Meni sulýlyqqa qumartýdan maqurym ettiń. Al syrtqa shyǵatyn bolsań, elden erek sándenip alasyń. Men sonda ǵana seniń bar sulýlyǵyń maǵan arnalmaǵandaı azapty kúı keshtim.
***
Úılenýden buryn aqyldy qalpyńmen meni erekshe baýraıtynsyń. Ol kezdegi seniń aldyńdaǵy sezimimdi beıneleýge qazir tilim jetpes edi. Al úılengen soń she?! Barlyǵyn ózim basqaramyn dep turyp aldyń. Ár isti óz betińmen, óz sheshimińmen atqarasyń. Bir ret bolsyn, meniń tilimdi alyp kórdiń be?! Seniń nazaryńdaǵy erkek qaıda ketti sonda?!
***
Úılenýden buryn meni aqyldy, isker dep maqtaıtynsyń. Qyzmette, kásibimde tabysqa jetýime qoldaý kórsetip otyratyn ediń. Al úılengen soń, sen meniń jasaǵan jaqsylyqtarymdy kórmeıtin boldyń. Qansha qarajat tapsam da, sen úshin ol az boldy. Sál kemshiligimdi kórseń, qalǵan bar jaqsylyǵymdy rásýa etip, joqqa shyǵardyń.
***
Úılenýden buryn ár sózim saǵan sondaı maǵynaly, tátti seziletin. Ol kezde ózimdi jurt kózine keńpeıil kórinetin shyǵarmyn dep oılaýshy em. Únemi syrlasatyn edik. Al úılengen soń, saǵan aıtqan árbir syrym, árbir keńesimniń sońy uryspen aıaqtalyp jatty. Keı sátterde sol burynǵydaı saǵan bar syrymdy aqtaryp, syrlasqym keledi. Meni túsinýińdi, sypaıy mámile jasaýyńdy qaladym. Alaıda taǵy da urys-kerispen aıaqtalatynyn bilip turǵandyqtan senimen sóılesýdi qoıdym.
***
Ómirde kinásiz, minsiz eshkim bolmaıdy. Únemi osynyń bári óz kinámnan bolar dep oılaımyn. Sóıtsem de, burynǵy júrgen qalpyma qaıtqym keledi. "Qaı jerden qate jiberdim? Qaıtsem túsinemin?" dep kóp oılandym. Alaıda óz kinásin tanyp-bile alar adam shynymen-aq az ekenine kózim jetti. Múmkin bar kinámdi sen bilersiń, sen aıtarsyń. Men ótken kúnderimdi qatty saǵyndym, sol kúnderge qaıtyp barǵym keledi. Kitap oqyǵan kezimde qasymda otyryp jalyqpaı tyńdaıtyn sátterińdi, janyma shýaq shashar meıirimdi kúlkińdi saǵyndym. Degenmen, endi bári oralmasqa ketti… Baqyt qashanda erli-zaıyptylardyń ekeýine de ortaq. Al sen baqytty bolamyn dep ketip barasyń! Biraq sen bil, baryn baǵalap, qanaǵat ete bilmegen júrek baılyqqa shomylsa da, ózin kedeı sezinetinin! Jáne taǵdyr qosqan jarynan tappaǵan baqytty áıel shaıtan salǵan shattyqtan taba almaıtynyn umytpaǵaısyń…
Pikir qaldyrý