Qytaı sarapshylarynyń birqatary nekege turmaǵan jastar memleketke qaýip tóndiredi dep esepteıdi. Bul týraly Sputnik Qytaı portaly jazdy dep habarlaıdy Qamshy.kz aqparat agenttigi.

Basylymnyń málimetine súıensek, Qytaıda 2015 jyly jalǵyz basty jastardyń sany 200 mıllıonnan asqan. Ǵalymdardyń saraptamasyna sáıkes, nekege turmaǵandardyń kóbi joǵarǵy oqý ornyn bitirgen, tabysy mol ári qalada turatyn jastar bolyp shyqty.

Halyqaralyq ekonomıkalyq forýmnyń dereginshe, búginde 35 jasqa deıingi aılyǵy joǵary mamandar 20 jyl burynǵy zamandastaryna qaraǵanda kerek-jaraǵyna jumsaıtyn qarajat kólemi 40 esege artyq. Ǵalymdar, bul qoǵamdyq másele ekenin eskertti. Atalmysh fakt ekonomıkaǵa keri áserin tıgizýi múmkin eken.

Qytaı Ulttyq Ekonomıkalyq Strategıa Akademıasynyń sarapshysy Chjan Nınniń pikirinshe, tabysy mol ári jalǵyz basty jastardyń kóbeıýi oıyn-saýyq ındýstrıasynda satylymnyń artýyna septigin tıgizgenimen, el ekonomıkasyn shyǵynǵa ushyratady. Onyń aıtýynsha, otbasynyń qamyn oılamaıtyn jalǵyz basty jastar óz karerasyna asa mán berip, tabysyn qalaı kóterýdiń jolyn izdeıdi.

«Jalǵyz adamdardyń kóbeıýi ýaqyt óte kele týý deńgeıiniń tómendeýine ári qart adamdardyń ósýine ákelip soǵady. 10-20 jyldan soń eńbekke jaramdy azamattardyń sany azaıyp, zeınetaqymen qamsyzdandyrý máselelerinde qıyndyq týyndaıtyny sózsiz», – dedi sarapshy.