Almaty ortalyq meshitinde aıt namazy oqylyp, arty merekelik is-sharalarmen jalǵasty, dep jazady Qamshy.kz aqparat agenttigi.

 Namazǵa 20 000-ǵa jýyq adam qatysty. Namaz sońynda qala ımamy Nurbek Aýezhanuly elimiz, jurtymyz úshin duǵa jasap, aıttan aıtqa aman-esen jetýdi tiledi.

Namazdan keıin meshit aýlasynda qoshqar palýan, asyq atý, arqan tartys, qol kúres syndy sporttyq sharalarmen qatar  ulttyq óner de kórsetildi. Sondaı-aq, meshit janynda arnaıy tigilgen shatyrda kezegimen 1000 adamǵa arnalyp as tarqatyldy. Sporttyq sharalardyń jeńimpazdaryna baǵaly syılyqtar taratyldy. Bul is-sharalarǵa kózaıym bolǵan jamaǵat pen qala qonaqtary merekelik kóńil-kúımen tarqasty.

Meıramdardyń sultany Qurban aıt — barsha musylman qaýymyna ortaq ulyq meıram. Ol Oraza aıttan 70 kúnnen keıin bastalyp, 3 kúnge sozylady. Bul kúnder Uly Mekkege qajylyqpen aıaqtalady. Aıt kúnderi qurbandyq shalynady. Bul musylmandardyń bes paryzynyń biri.

urban Aıt meıramynyń paıda bolý tarıhy qasıetti Quran kitabynda jazylǵan jáne ol Ibrahım paıǵambardyń ómirimen baılanystyrylady.

Kúnderdiń kúninde Ibrahım paıǵambarǵa óziniń týǵan uly Ismaıldy Alla úshin qurban etý týraly aıan beriledi. Quranǵa sáıkes, paıǵambar kórgen tús shyndyq bolyp sanalady jáne oǵan kúmán keltirýge bolmaıdy. Allanyń buıryǵyna qarsy shyǵa almaǵan Ibrahım jalǵyz ulyn alyp, búginde Mekke qalasy ornalasqan sol kezdegi Mına ańǵaryna attanady. Ibrahım pyshaǵyn kezeı bergende kókten perishte túsip, ony toqtatady.

Ańyz boıynsha, Jaratqannyń buıryǵy paıǵambar úshin synaq bolyp tabylady. Paıǵambardyń nıetine jaýap retinde Alla Taǵala jumaqtan qurbandyqqa shalý úshin qoı malyn túsiredi.

Qurban shalý meıramy Jaratqanǵa qulshylyq etýdiń belgisi bolyp tabylady. Musylman qaýymy Allaǵa et nemese qan emes, quldarynyń taqýalyq etýi mańyzdy dep sanaıdy.

Qurban Aıtta qurban shalý Aqyret kúninde musylmannyń janyn saqtap, Jumaqqa jol ashady degen senim bar. Jalpy bul mereke musylmannyń Allaǵa tolyqtaı baǵynyshtylyǵyn bildiredi.

Qurbandyq shalý barysynda ár musylman nıet etip, isti Allanyń atymen bastaýy kerek. Alla jaqyndarymdy ala kórmesin dep qurban shalatyn musylmandar da kóp.

Islam kúntizbesi boıynsha onynshy aı musylmandar úshin qasıetti aı sanalady. Bul aıdyń alǵashqy on kúndiginde musylmandar bar ynta-nıetimen Allaǵa qulshylyq jasaıdy. Aıdyń toǵyzynshy kúni – Arafanyń ıslam dinin ustanatyndar úshin orny erekshe.

Qurban aıt merekesi (Zılhıj-janyń 10-ynshy kúni) tań atqannan keıin Mýzdálıfáda tań namazyn oqýdan bastalady. Musylmannyń namazdy meshitte oqýǵa múmkindigi bolmasa, ol qulshylyqty óz úıinde jasaı alady. Allaǵa qulshylyq jasap, ımam ýaǵyzyn tyńdaǵan soń musylmandar ómirden ótken adamdarǵa Quran baǵyshtaý úshin zeıit basyna barady.

Bul aıtýly merekeniń eń mańyzdy amaly – qurbandyq shalý. Qurbandyqqa qoı, eshki, sıyr jáne túıe malyn shalady. Basqa janýarlar qoldanylmaıdy. Aýrý, soqyr mal qurbandyqqa shalynbaıdy. Bul kúni musylman jamaǵatyn, tipti ıslam dinin ustanbaıtyn adamdardy etpen tamaqtandyrǵan saýapty iske jatady.

Aıttyń birinshi kúninde adamdar bir-birin quttyqtap, bir-biriniń úıinen dastarqannan dám tatady, bul kúni ár musylmannyń úıinde dastarqan jaıylady. Áıelder qaýymy Qurban aıtta baýyrsaq, shelpek pisirip, dastarqan mázirin daıyndaıdy.

Aıttyń ekinshi kúni musylmandar kóbinese qoıdyń basy men aıaǵynan jasalǵan sorpa ázirleıdi. Jalpy qurbandyqqa shalynǵan maldy meıram barysynda jep qoıý kerek degen qaǵıda bar.

Qurban aıtta ár adam óziniń otbasyna kóbirek kóńil bólip, múmkindiginshe muqtaj jandarǵa kómektesýi tıis.